O‘zbekistonga transport inqirozi olib kelishi mumkin bo‘lgan muammolarni bartaraf etish uchun 11 milliard dollar kerak. Bu haqda Toshkent davlat transport universiteti professori Daurenbek Ilesaliyev aytib o‘tdi.
Undan avval xalqaro transport va logistika sohasidagi rossiyalik ekspert Aleksey Bezborodov LogiStan Telegram kanaliga bergan intervyusida yaqin ikki yilda O‘zbekiston transport sanoati inqirozga yuz tutishini, bunga sabab logistika ishlab chiqarishning o‘sishiga monand ketmayotganini aytgandi.
Aleksey Bezborodovning fikricha, inqiroz oqibatlarini bartaraf etish uchun 50 milliard dollar talab etiladi. O‘zbekistonlik ekspert Daurenbek Ilesaliyev esa bunga 11 milliard dollar mablag‘ yetarli degan fikrda.
Uning ta’kidlashicha, haqiqatdan ham transport, sanoat va qishloq xo‘jaligi sohalari vakillari defitsitga duch kelmoqda. Vaziyatga texnologik taqchillik ham taʼsir ko‘rsatyapti.
“Bu, ayniqsa, yig‘im-terim va hosilni yetkazib berish qizg‘in pallasiga to‘g‘ri keladi. Bunday paytlarda meva-sabzavot yuklarini yetkazib berishda narxlarning oshishi kuzatilmoqda”, — deydi Daurenbek Ilesaliyev.
Ekspertning aytishicha, O‘zbekistondagi nazorat-o‘tkazish punktlari Qirg‘izistonga nisbatan ilg‘or infratuzilmaga ega. O‘zbekiston Respublikasida ayrim nazorat-o‘tkazish punktlarida kutish vaqti kamaydi.
Daurenbek Ilesaliyev O‘zbekistonda transport-logistika sohasidagi muammolarni hal etish uchun avvalo bu muammoni ommalashtirish, davra suhbatlari, konferensiya va boshqa tadbirlar tashkil etishib, masalalarga e’tiborni qaratish va birgalikda yechim topish lozim.
Izoh (0)