Россиялик хонанда Алсу Москва шаҳри марказидаги ҳашаматли квартирасини сотувга қўйди (фото)

Россиянинг кўчмас мулк сотуви билан шуғулланувчи агентликлардан бири хонанда Алсуга тегишли, майдони 250 квадрат метр бўлган ҳашаматли квартиранинг суратларини интернетга жойлади.

Маълум бўлишича, хонанда 18 ёшга тўлганда отаси томонидан совға қилинган квартира сотувга қўйилган.

Май ойининг охирида Алсу турмуш ўртоғи Ян Абрамов билан ажрашиш учун судга даъво аризаси билан мурожаат қилди. 2 июль куни эса Савелов судининг веб-сайтида хонанданинг яна бир даъвоси — никоҳ даврида биргаликда харид қилинган мол-мулкни бўлиш тўғрисидаги аризаси ҳақида маълумот пайдо бўлди. Ушбу масала бўйича суд мажлиси 26 июль санасига белгиланган.

Шунингдек, Алсу ажрим ва мол-мулкни бўлиш масалалари билан бирга, Москва шаҳри марказида жойлашган ўзига тегишли хонадонни сотишга қарор қилган.

Россия ОАВлари ёзишича, кўп қаватли бино 1912 йилда қурилган бўлиб, бугунги кунгача мукаммал кўринишда сақланиб қолган. Ушбу уйдаги хонадонлардан бири Михаил Булгаковнинг “Зойканинг квартираси” асарида тасвирланган. Шифтларининг баландлиги 3,2 метрни ташкил қиладиган хоналар классик усулда жиҳозланган.

Хонадон майдони 247,7 кв/м бўлиб, учта ҳашаматли ётоқхона, учта ҳаммом, кир ювиш хонаси, гардероб, ошхона, овқатланиш хонаси, меҳмонхона ҳамда омборхонадан иборат.

Кўчмас мулк сотуви билан шуғулланувчи агентликнинг сўзларига кўра, квартира яқин орада таъмирдан ўтказилиб, унда сифатли ва қимматбаҳо материаллардан фойдаланилган.

Эълон дастлаб 22 апрель куни берилган ва уйга 318 миллион рубль (3 миллион 620 минг доллар) нарх белгиланган. 20 июнь куни кўчмас мулк нархи 299 миллион рубль (3 миллион 340 минг доллар)ни ташкил этди. Шундай қилиб, уйнинг нархи 19 миллион рублга камайди.

Алсуга тегишли хонадон сотуви бўйича маълумотни хонанда тасдиқламади. Квартирани сотиш билан Москва кўчмас мулк агентликларидан бири шуғулланмоқда.

Россия ОАВ маълумотларига кўра, ажрим бўйича Алсу ва Ян Абрамов Москвадаги тўрт қаватли уйни, Ленинградское Шосседаги қимматбаҳо квартирани, Буюк Британиядаги уйни ҳамда  Санкт-Петербургдаги квартирани бўлишишлари керак.