Тадқиқот: фуқароларнинг неча фоизи муаммоларини ноқонуний йўл орқали ҳал этишга уриниши маълум қилинди

Бугун, 3 июль куни Коррупцияга қарши курашиш агентлигида “Аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини жорий қилиш чора-тадбирлари тўғрисида”ги президент қарорининг мазмун-моҳиятига бағишланган матбуот анжумани бўлиб ўтди. Бу ҳақда “Дарё” мухбир хабар бермоқда.

Анжуманда Коррупцияга қарши курашиш агентлиги директорининг ўринбосари Умида Тўхташева мазкур қарорнинг қабул қилиниши заруратига тўхталиб ўтди: 

• Биринчидан, бугунги кунда аҳоли ва давлат хизматчиларини коррупцияга қарши курашиш соҳасидаги билимларини узлуксиз ошириб бориш тизими мавжуд эмас;
• Иккинчидан, коррупцияга қарши ички назорат тузилмалари ходимларининг малакасини ошириш тизими йўлга қўйилмаган;
• Учинчидан, соҳа бўйича миллий ва халқаро асослар, хорижий тажриба, илмий-амалий ишланмалар бўйича электрон маълумотлар базаси шаклланмаган.

“Ижтимоий фикр” республика жамоатчилик фикрини ўрганиш маркази билан биргаликда ўтказилган тадқиқот натижаларига кўра, 31 фоиз респондентлар фуқароларнинг ўз масалалари ёки муаммоларини қонунни четлаб ўтган ҳолда ҳал этишга интилиши, 28 фоизи эса фуқароларнинг қонунлар ва ўз ҳуқуқларини яхши билмаслиги коррупциявий муносабатлар пайдо бўлишининг асосий сабаблари сифатида кўрсатилган.

Ёшлар ўртасида ўтказилган сўровномада атиги 51 фоиз респондентларгина коррупциянинг моҳиятини тўғри тушунишини таъкидлаган.

Аниқланишича, фуқароларни коррупциявий муносабатларга ва ноқонуний хатти-ҳаракатларга ундайдиган асосий сабаблар бюрократик пайсалга солинишлардан қутулиш истаги, мавжуд муаммоларни ҳал қилишга интилиш ёки шунга эҳтиёж, муаммони қонуний ҳал қилиш учун вақт ёки имкониятнинг йўқлиги ҳисобланади. Шунингдек, пора ёрдамида масалаларни ҳал қилиш одатий амалиёт, умумқабул қилинган хатти-ҳаракат, муаммони ҳал қилишда ёрдам берган мансабдор шахсга миннатдорчилик билдириш шакли ҳисобланади, деган тасаввур жамоатчиликда кенг тарқалган.

Аввалроқ 2023 йилда республика бўйича жами 6 535 нафар шахс коррупцияга оид жиноятлар учун жиноий жавобгарликка тортилган бўлиб, 2022 йилга нисбатан жавобгарликка тортилганлар сони 879 нафарга ёки 12 фоизга камайгани тўғрисида хабар берилганди.