“Ҳокимга, бизнес-омбудсманга раҳмат”. Қашқадарёда газ таъминотидан узиб қўйилган тадбиркор муаммоси ҳал этилди 

Қашқадарёда фаолият юритувчи 2 та метан заправка газ етказиб бериш тўхтатилгани боис фаолиятини вақтинча тугатгани, бу ҳақда “Дарё”га мурожаат қилган тадбиркорнинг 50 нафарга яқин ишчиси айни пайтда ишсиз қолгани ҳақида хабар берилганди. Тадбиркорнинг 2024 йил 3 июль куни таҳририятга билдиришича, унга газ етказиб бериш бошланган ва фаолияти давом эттирилмоқда.

Вилоят ҳокими Муроджон Азимов муаммомизга бефарқ қарамай, бизни эшитди. Ва ҳал этди. 2024 йилнинг 3 июлидан бошлаб фаолиятимиз қайта тикланди. Қарши ва Нишон туманларидаги заправкаларимиз ҳам очилди, — дейди тадбиркор Хуршид Янгибоев.

Мурожаатчи, шунингдек, бизнес-омбудсман девонининг вилоятдаги вакиллари Шероз Шодиев ҳамда Исмоил Саидовларга ҳам ташаккур изҳор қилиб, улар тадбиркор муаммосига эътиборсиз бўлмаганидан мамнун эканини таъкидламоқда. 

Эслатиб ўтамиз, 2024 йилнинг 3 апрель куни “Ҳудудгазтаъминот” АЖ вакилларидан иборат ишчи гуруҳ текширувидан сўнг, тадбиркорга қарашли метан заправкаларда шундай ҳолат юзага келганди.