“Hokimga, biznes-ombudsmanga rahmat”. Qashqadaryoda gaz ta’minotidan uzib qo‘yilgan tadbirkor muammosi hal etildi

Qashqadaryoda faoliyat yurituvchi 2 ta metan zapravka gaz yetkazib berish to‘xtatilgani bois faoliyatini vaqtincha tugatgani, bu haqda “Daryo”ga murojaat qilgan tadbirkorning 50 nafarga yaqin ishchisi ayni paytda ishsiz qolgani haqida xabar berilgandi. Tadbirkorning 2024-yil 3-iyul kuni tahririyatga bildirishicha, unga gaz yetkazib berish boshlangan va faoliyati davom ettirilmoqda.

Viloyat hokimi Murodjon Azimov muammomizga befarq qaramay, bizni eshitdi. Va hal etdi. 2024-yilning 3-iyulidan boshlab faoliyatimiz qayta tiklandi. Qarshi va Nishon tumanlaridagi zapravkalarimiz ham ochildi, — deydi tadbirkor Xurshid Yangiboyev.

Murojaatchi, shuningdek, biznes-ombudsman devonining viloyatdagi vakillari Sheroz Shodiyev hamda Ismoil Saidovlarga ham tashakkur izhor qilib, ular tadbirkor muammosiga e’tiborsiz bo‘lmaganidan mamnun ekanini ta’kidlamoqda. 

Eslatib o‘tamiz, 2024-yilning 3-aprel kuni “Hududgazta’minot” AJ vakillaridan iborat ishchi guruh tekshiruvidan so‘ng, tadbirkorga qarashli metan zapravkalarda shunday holat yuzaga kelgandi.