“Жиноий асар”, “Керри”, “Юзсиз” фильмларидаги роллари билан Голливуддаги энг талабгир актёрлардан бирига айланган Жон Траволта бир неча йиллик тажрибага эга профессионал учувчидир. У илк бор 22 ёшида турли ҳаво кемалари учувчиси сертификатини олган.
70 ёшга тўлган актёр бугун ҳам самолёт ва вертолётни аъло даражада бошқаради. Бир неча кун аввал Траволта мутахассислиги бўйича ўз малакасини расман оширди. Актёр ўзини парвоз симулятори кабинасида видеотасвирга олди ва кадрларни мухлислари билан бўлишди.
Машғулот пайтида Траволта иккита двигатель ишдан чиққан тақдирда нима қилиш кераклигини машқ қилди.
Малака ошириш дарсида учта двигателдан иккитаси “ишдан чиқарилади”. Мен ҳар йили реактив самолётни бошқариш бўйича малака ошириш курсларидан ўтишим керак, — деди актёр ижтимоий тармоқдаги видеода.
Траволта парвоз вақтида фавқулодда хавфли вазиятларга ҳам тушган. 1992 йилда у барча оила аъзолари билан учиб кетаётган вақтда самолётнинг электр қувват манбаи ишдан чиққан, аммо актёр бундай вазиятда ўзини йўқотмаган ва хавфли вазиятдан чиқишга муваффақ бўлган.
Умри давомида Жон Траволта реактив самолётларни бошқаришга доир саккизта лицензияга эга бўлди ва актёрнинг камида еттита шахсий самолёти мавжуд.
Изоҳ (0)