“Ўзбекистон темир йўллари” ва Hyundai Rotem ўртасида электропоездлар сотиб олиш шартномаси имзолангани тўғрисида хабар берилганди. “Дунё” агентлигининг ёзишича, ушбу поездларнинг ҳар бири еттита вагонга эга бўлади.
Жанубий Корея президентининг Ўзбекистонга давлат ташрифи чоғида “Ўзбекистон темир йўллари” акциядорлик жамияти ва Жанубий Кореянинг Hyundai Rotem компанияси ўртасида 250 км/соат тезликка мўлжалланган олтита тезюрар поездни етказиб бериш ва техник хизмат кўрсатиш бўйича шартнома имзоланганди.
Такидланишича, Ўзбекистон учун мўлжалланган тезюрар поезд “КТХ-Eum” поездининг ўхшаши бўлиб, у ўз навбатида 430 км/соат тезликда ҳаракатланиш учун мўлжалланган “HEMU-430Х” тезюрар поезди негизида яратилган. Ҳар бири етти вагонли поезд 389 ўринга эга бўлади ва VIP, бизнес ва эконом классларни, шунингдек, овқатланиш вагонини ўз ичига олади.
Ўзбекистонга тақдим этилаётган тезюрар поезд ”Жалолиддин Мангуберди“ деб номланади. Ушбу тезюрар поезд ишга тушгач, Тошкентдан Хивагача бўлган масофа етти соатда босиб ўтилиши кутилмоқда, — дейилади хабарда.
Маълумот учун, Ўзбекистонга Жанубий Кореянинг Hyundai Rotem поездларини етказиб бериш бўйича вазифалар президентнинг 2023 йил 10 октябрдаги “Ўзбекистон Республикаси темирйўл транспорт соҳасини тубдан ислоҳ қилиш чора-тадбирлари тўғрисида”ги қарорида кўзда тутилган. Февраль ойида 6 та юқори тезликда ҳаракатланувчи шундай электропоездларни етказиб бериш истиқболлари муҳокама қилинганди.
Изоҳ (0)