Президент Шавкат Мирзиёев томонидан имзоланган қонун билан конвенция ратификация қилинди. Бу ҳақда Telegram’даги “Ҳуқуқий ахборот” канали хабар берди.
Унга кўра, Халқаро меҳнат ташкилотининг Ишлаётган эркаклар ва аёллар учун тенг муносабатлар ва тенг имкониятлар: оилавий мажбуриятларга эга ходимлар тўғрисидаги 156-сонли конвенцияси (Женева, 1981 йил 23 июнь) ратификация қилинган.
Аввалроқ Жаҳон банки ҳисоботида қонунчиликдаги ижобий ўзгаришлар ва инсон капитали ривожланишига қарамай, Ўзбекистонда меҳнат бозорида гендер тенгсизлик ҳали ҳам сақланиб қолаётгани айтилган эди.
Агар хотин-қизлар иқтисодий фаолиятда эркаклар билан бирдек иштирок этса, Ўзбекистонда миллий даромад 29 фоизга ошади. Аёлларнинг эркаклар билан бир хил даражада маош олишини таъминлаш 700 мингдан ортиқ одамни камбағалликдан чиқаришга ёрдам беради, — дейилган ҳисоботда.
Март ўрталарида эса Ўзбекистонда иш ҳақини ҳимоя қилиш тўғрисидаги конвенция ратификация қилингани тўғрисида хабар берилганди.
Изоҳ (0)