Ўзбекистонда иш ҳақи ўз вақтида тўланишини таъминлашга қаратилган конвенция ратификация қилиниши маъқулланди

Олий Мажлис Сенатининг 50-ялпи мажлисида “Халқаро меҳнат ташкилотининг Иш ҳақини ҳимоя қилиш тўғрисидаги 95-сонли конвенциясини ратификация қилиш ҳақида”ги қонун кўриб чиқилиб, маъқулланди.

Конвенция иш берувчилар томонидан пул шаклида иш ҳақи ўз вақтида тўланишини таъминлашга қаратилган. Конвенция қоидалари иш ҳақи тўланадиган ёки тўланиши лозим бўлган барча шахсларга нисбатан қўлланилади. Конвенция иқтисодий фаолиятнинг барча соҳалари ва ишчилар тоифаларига татбиқ этилади.

Сенат матбуот хизматининг маълум қилишича, муҳокама давомида конвенцияда иш ҳақини қарз мажбуриятлари, тилхат, купон ёки бошқа шаклда, шунингдек, таркибида алкогол миқдори юқори бўлган спиртли ичимликлар, организм учун зарарли гиёҳванд моддалар кўринишида тўлаш тақиқлангани таъкидланди.

Сенаторлар конвенция нормалари Ўзбекистон қонунчилигига, шунингдек, “Ўзбекистон – 2030” стратегиясининг мақсад ва вазифаларига тўлиқ мос келишини қайд этди.

Муҳокама чоғида конвенциянинг ратификация қилиниши меҳнаткашлар ҳуқуқларини ҳимоя қилиш бўйича қўшимча кафолатлар яратишга имкон бериши, меҳнатни муҳофаза қилиш миллий тизимини янада такомиллаштиришга салмоқли туртки бериши айтиб ўтилди.

Сенаторлар конвенциянинг ратификация қилиниши меҳнат соҳасидаги миллий қонунчиликни такомиллаштириш ва халқаро меҳнат стандартларини самарали жорий этишни таъминлашга хизмат қилишини, шунингдек, Ўзбекистоннинг ходимлар ҳуқуқлари кафолатларини таъминлаш бўйича асосий халқаро принцип ва стандартларга содиқлигини кўрсатишини алоҳида таъкидлади.

Ушбу конвенция жаҳоннинг 99 та давлати томонидан ратификация қилинган.