25-сентябр куни актёр Уилл Смит 55 ёшини нишонлади. Шу муносабат билан актёр иштирокидаги энг яхши фильмлар рўйхатини туздик.
“Али”, 2001 йил
Режиссёр: Майкл Манн
Бош ролларда: Уилл Смит, Жейми Фокс, Жон Войт
Кассиус Клей — ёш ва умидли боксчи Сонни Листон билан жанг қилади. Сюжет нафақат унинг карьераси, балки ижтимоий фаолияти атрофида ҳам ривожланади. Шунингдек, ижодкорлар бош қаҳрамон Муҳаммад Алига айланган босқични ҳам эътибордан четда қолдирмаган. Қизиғи шундаки, Смит дастлаб бу ролга рози бўлмаган, аммо спортчининг ўзи уни кўндирган. Актёр кўп ойлар давомида рингда машқ қилди, унинг саъй-ҳаракатлари бесамар кетмайди — мазкур роли учун у “Оскар” мукофотига лойиқ кўрилади.
“Бахт ортидан қувиб”, 2006 йил
Режиссёр: Габриэль Муччино
Бош ролларда: Уилл Смит, Жейден Смит
Фильм энг муваффақиятли брокерлардан бирига айланган ва энг йирик инвестиция компанияси асосчиси бўлган ёлғиз ота Крис Гарднернинг ҳаётий ҳикоясига асосланган. Аммо фаолиятининг бошида у ҳам пул билан боғлиқ муаммоларга дуч келади. Крис маош тўланмайдиган олти ойлик стажировкадан ўтади, у ерда 19 та рақобатчини мағлуб этиши керак эди. Бош қаҳрамонни Уилл Смит, унинг ўғли образини эса актёрнинг фарзанди Жейден ўйнаган. Лойиҳа Смитга иккинчи “Оскар” номинациясини олиб келади, ўғли эса МTV мукофотига сазовор бўлади — ёш истеъдод “Йил ютуғи” деб топилади.
“Мен афсонаман”, 2007 йил
Режиссёр: Френсис Лоуренс
Бош ролларда: Уилл Смит, Элис Брага
Фильм воқеалари пост-апокалиптик Нью-Йоркда бўлиб ўтади. Инсониятнинг ярми ҳалок бўлган, қолган ярми зомбиларга айланган. Фақат Роберт Невиллгина иммунитети сабаб тирик қолган. Ёлғизликни енгиш учун у оддий турмуш тарзини олиб боришга ҳаракат қилади, шунингдек, зарарланган одамларда синов ўтказиб, вакцина ихтиро қилишга ҳаракат қилади. Бир кун унинг тажрибаси кутилмаган натижани беради — энди бош қаҳрамон ёрқин келажакка умид қилиши мумкин.
“Етти тақдир”, 2008 йил
Режиссёр: Габриел Муччино
Бош ролларда: Уилл Смит, Росарио Доусон, Вуди Харрельсон
Таъсирли ва фожиали фильмда етти кишининг ҳаётини сақлаб қолган Тим Томас ҳақида ҳикоя қилинади. Вақт ўтганига қарамай, қаҳрамон ҳали ҳам виждон азобидан қутулолмайди. Бундан қутулиш учун эса “қарз тўлаш” режасини ўйлаб топади. Тим органлар донорига айланади. Бироқ у фақат иккинчи имкониятга лойиқ бўлганларни танлайди. Бош қаҳрамон унда яшаш истагини уйғотадиган янги бемор билан учрашганда ҳаммаси ўзгаради.
“Хенкок”, 2008 йил
Режиссёр: Питер Берг
Бош ролларда: Уилл Смит, Шарлиз Терон, Жейсон Бейтман
Ханкок супер қудратга эга. Уни қаҳрамон деб аташ осон эмас, лекин уни ёвуз деб ҳам бўлмайди. У ёввойи турмуш тарзини олиб боради, лекин жамият хавф остида бўлганда, у ёрдамга келади. Бир куни у пиар-менежер Рейни қутқаради ва у миннатдорлик белгиси сифатида Хенкокка имижи устида ишлашни таклиф қилади. Аммо маълум бўлишича, Хенкок сайёрадаги ягона ўзига хос мавжудод эмас — бу унинг атрофидагилар учун катта муаммога айланади.
“Фокус”, 2014 йил
Режиссёрлар: Жон Рекуа, Гленн Фикарра
Бош ролларда: Уилл Смит, Марго Робби
Бу сафар Уилл Смит мафтункор ўғри Жесс билан учрашадиган фирибгар Ники ролини ўйнайди. Қиз тажрибали фирибгарни унинг устози бўлишга кўндиради. Кўп ўтмай, бош қаҳрамонлар бир-бирларини севиб қолишади, лекин уларнинг ҳар бир ҳаракати яхшиликка олиб келмайди.
“Қирол Ричард”, 2021 йил
Режиссёр: Рейналдо Маркус Греен
Бош ролларда: Уилл Смит, Сания Сидней, Деми Синглетон
Ушбу фильм бўлмаганида бу рўйхат тўлиқ бўлмасди. Смит яна биографик фильмда теннисчилар Венера ва Серенанинг отаси Ричард Уильямс ролини ўйнайди. Болалигидан у фарзандларини буюк спортчилар бўлишларига ишонтириб ўстирган. Вақт ўтгач, қизларининг каттаси таниқли мураббий Пол Коэн эътиборига тушади. Кичик қизи ортда қолмаслиги учун Ричард барча машғулотларни ёзиб олади ва у билан ўзи шуғулланади. Мазкур рол туфайли актёр истеъдодининг янги қирраларини очиб беради ва буни танқидчилар ҳам, томошабинлар ҳам таъкидлашади. Ушбу роли учун актёр 2022 йилда яна бир бор “Оскар”га муносиб кўрилади.