Жиззахда Lacetti ва автобус иштирокида содир бўлган йўл-транспорт ҳодисаси оқибатида бир киши ҳалок бўлди. Бу ҳақда вилоят ИИБ Йўл ҳаракати хавфсизлиги бошқармаси хабар берди.
Қайд этилишича, 25 май куни 09:15 ларда Шароф Рашидов тумани “Ёйилма” МФЙ ҳудудидан ўтган М-39 Тошкент—Термиз автомобиль йўлининг 979-километрида йўл-транспорт ҳодисаси содир бўлган.
Навоий вилояти Хатирчи туманида яшовчи 21 ёшли С.А. Lacetti русумли автомашинасини Самарқанд—Тошкент йўналишида бошқариб бораётиб, 4.1.1 йўл белгисига амал қилмасдан орқага қайрилиб олиб, қарама-қарши йўналишда ҳаракатланиб кетаётган 53 ёшли Х.Р. бошқарувида бўлган YBL613OH русумли йўловчи ташувчи автомашина йўлига чиқиб кетган.
ЙТҲ оқибатида Lacetti салонида бўлган 2003 йилда туғилган йўловчи олган жароҳатлари туфайли воқеа жойида вафот этган ҳамда 2004 йилда туғилган яна бир йўловчи ва автомашина ҳайдовчиси олган тан жароҳатлари сабаб РШТЁИМ Жиззах филиалининг жонлантириш бўлимига ётқизилган.
Суриштирув ишлари давомида автобус ҳайдовчиси ва салонида бўлган йўловчиларга тан жароҳати етмагани, Lacetti ҳайдовчиси ва йўловчилар умумтаълим мактаби ўқувчилари бўлмагани аниқланган.
Куни кеча Тошкент вилоятининг Тошкент туманида тўртта автомобиль иштирокида ЙТҲ содир бўлгани, оқибатда Toyota Prado ҳайдовчиси вафот этгани тўғрисида хабар берилганди.
Изоҳ (0)