Туркия ва Покистон жорий ҳафтада Ўрта Ер денгизининг шарқий қисмида ҳамкорликдаги ҳарбий машғулотлар ўтказди. Бу ҳақда Anadolu нашри хабар берди.
Туркия ва Покистон ҳарбий-денгиз кучлари жорий ҳафтада Шарқий Ўрта Ер денгизида оператив тайёргарликни кучайтириш ва ҳамкорликни ривожлантириш мақсадида қўшма машғулотлар амалга оширган. Ҳарбий машқлар “Turgutreis-9” деб номланган.
“Ўқув машғулотлари Шарқий Ўрта ер денгизида TCG Heybeliada корвети, ТCG Doganay сувости кемаси ва Покистон ҳарбий-денгиз кучларининг PNC Bobur корвети иштирокида ўтказилди”, — дейилган Туркия Миллий Мудофаа вазирлиги баёнотида.
Покистон ҳарбий-денгиз кучлари баёнотида айтилишича, душанба ва сешанба кунлари Голжук ҳарбий-денгиз базасида ўтказилган машғулотлар PNC Bobur экипажини турли денгиз амалиётларини ўтказишга ўрганишдан иборат бўлган. Шунингдек, Покистон ва Туркия томони ўзаро ҳамкорликни кучайтириш ва икки денгиз флоти ўртасидаги икки томонлама муносабатларни янада мустаҳкамлаш борасида учрашувлар ташкил этган.
PNC Bobur корвети Покистон денгиз кучларининг энг сўнгги ва замонавий воситаларидан бири ҳисобланади. Ушбу корвет Милгем типидаги кема бўлиб, ҳозирда у Осиёда фақат Истанбул денгиз флоти заводида ҳамда Карачидаги муҳандислик заводида ишлаб чиқарилмоқда.
Изоҳ (0)