Сўнгги вақтларда биз замонавий технологиялар намунаси — турли роботларнинг кўплаб имкониятларидан бохабар бўлдик.
Масалан, денгиз ва океанлар тубининг геологик тузилиши ҳамда ундаги жонзотларни видеотасвирга оладиган пингвин-робот, араб ва инглиз тилларида сўзлашадиган ва сунъий интеллектга эга аёл-робот, зефир қовуришни, кийимларни тахлаб қўйишни ва гулларни суғоришни биладиган MagicBot шулар жумласидандир.
Энди эса Хитойдаги яна бир робот-гуманоид — XBot-L билан танишинг. У Буюк Хитой девори бўйлаб юрган дунёдаги биринчи робот ҳисобланади.
XBot-L робот Хитой девори йўлларидан: баланд ва пастлик, текис бўлмаган сирт бўйлаб бемалол ҳаракатлана олади. У чуқурликлар ва бўртиқлардан қоқилиб кетмайди, шунингдек, зинапоялардан ҳам кўтарила олади. Шунингдек, гуманоид деворнинг паст ва тор йўлакларидан энгашиб ўта олади. Robot Era маълумотларига кўра, бошқа роботлар бундай вазифани бажара олмайди. Қизиқарлиси, XBot-L бутунлай қоронғи жойда ҳам қийналмай ҳаракатланиши мумкин.
Бундай ажойиб координацияга келишига RL деб номланган патентланган технология сабабчидир.
“Perceptual RL алгоритмлари роботнинг нотаниш релефга дуч келганида идрок этиш ва қарор қабул қилиш қобилиятини кучайтиришга ёрдам беради”, — дейди Robot Era асосчиларидан бири Юе Си.
Nеw Atlas журналистлари савол билан мурожаат этишди: “Робот-гуманоид учун кириш бепулми?”
Одатда Буюк Хитой девори сайёҳлар билан тўла бўлсада, видеода робот ёлғиз тасвирланган. У ерга кириш 45 юан (6,5 доллар) туради. Мутахассислар роботларнинг жамоат жойларига ташриф буюришлари учун тўлов жотрий қилишни таклиф қилмоқда.
Масалан, бирор киши гуманоид билан автобусга чиқса, ўзи учун ҳам, робот учун ҳам бир хил пул тўлаши лозим, чунки гуманоид реал одам каби жой эгаллайди.
Изоҳ (0)