Dengiz va okeanlar tubining geologik tuzilishi hamda undagi jonzotlar haqidagi ma’lumotning atigi 5 foizi fanga ma’lum. Shuning uchun dengiz ostidagi dunyoni yanada chuqurroq o‘rganish maqsadida Germaniyaning EvoLogics texnologiya kompaniyasi muhandislari Quadroin qurilmasini ishlab chiqdi.
Avtonom suvosti roboti dengiz va okeanlar tubini, uning aholisini videotasvirga oladi. Sun’iy pingvinga harakatlanadigan suvosti yo‘lining trayektoriyasini oldindan belgilash muhimdir. Qabul qilingan ma’lumotni robot Wi-Fi yoki Iridium orqali uzatadi.
To‘rtta suv osti dvigateli yordamida robot-pingvin 150 metr chuqurlikka tusha oladi, uning maksimal tezligi 18,5 km/soatga yetadi. Shuningdek, Quadroin 7 km/soat tezlikda 10 soat uzluksiz ishlay oladi.
Qurilmaga sun’iy intellekt ham o‘rnatilgan bo‘lib, ko‘plab sonar (tovushni aniqlaydigan va yozib oladigan moslama) hamda kameralar orqali atrofdagi obyektlarni aniqlay oladi, dengiz jonzotlari bilan to‘qnashib ketmaydi. Nortek Nucleus1000 suvosti navigatsiyasi esa robot harakatlanish trayektoriyasini kuzatib borishga xizmat qiladi.
Bundan tashqari, robot-pingvin suv ostini o‘rganish uchun qo‘shimcha jihozlarga ham ega: Quadroin suv bosimi, harorati, kislorod miqdori va fluorestensiya xossalarini o‘rgana oladi. HD kameralar orqali dengiz tubida aniq va yuqori sifatli fotosuratlar olish imkoniyati bor. O‘ta chuqur joyga tushgan qurilmaga maxsus fonarlar diod projektorlar yordam beradi.
Izoh (0)