Германия ва Франция Европа Иттифоқининг ҳашаматли товарлар, жумладан, автомобилларни Россияга жўнатиш имконини берувчи бўшлиқни ёпиш ниятига қарши чиқди. Бу ҳақда Politico хабар берди.
Politico’нинг уч нафар суҳбатдошига кўра, Берлин ва Парижнинг мухолифати ЕИ давлатларини G7 саммитида келишувга эришиш учун Россияга қарши 14-санкциялар пакети ва Беларусга қарши шунга ўхшаш чоралар кўриш ҳақида ўйлашга мажбур қилган. Нашрнинг таъкидлашича, бу ЕИга Беларусга қарши санкциялар бўйича келишмовчиликларни ҳал қилишни кечиктириб, йирик газ санкцияларини қўллашга имкон беради.
The German Economic Team (GET) ҳисоботига кўра, ўтган йили Европа Иттифоқидан Беларусга автомобиль импорти ҳажми 2,6 миллиард долларни (2,4 миллиард евро) ташкил этган, бу 2021 йилга нисбатан тўрт баравар кўп.
Ҳашаматли автомобиллар соҳасида энг катта нисбий ўсиш қайд этилган. Умумий импорт ўсишининг учдан икки қисми – 1,4 миллиард доллар (1,3 миллиард евро) “люкслар” ҳиссасига тўғри келган.
Politico билан суҳбатда ушбу воқеани шарҳлар экан, Германия ва Франциянинг номи ошкор этилмаган дипломатлари ўз мамлакатлари санкциялардан бўйин товлашнинг олдини олишга қаратилган чора-тадбирларни қўллаб-қувватлашини, лекин биринчи навбатда Россияга ҳарбий товарлар етказиб берилишига қарши курашиш зарур, деб ҳисоблашини таъкидлаган.
Изоҳ (0)