Сан-Франциско полицияси 3 июнь куни Исроил консуллиги биноси олдида намойиш уюштирган 70 дан ортиқ фуқарони ҳибсга олган. Бу ҳақда US News нашри хабар берди.
Манбада айтилишича, Фаластинни қўллаб, намойишга чиққан фуқаролар Исроил консуллиги биносига кириб олган. Расмийларнинг қатъий огоҳлантиришларига қарамай, намойишчилар бинони тарк этмаган.
АҚШнинг Сан-Франциско шаҳридаги полиция фавқулодда чақирувдан сўнг воқеа жойига етиб борган. Консуллик ҳудудига рухсатсиз кирган 70 дан ортиқ фуқаро қўлга олинган.
Намойишчилар кўп сонли бўлгани боис уларни полиция идорасига олиб кетиш учун микроавтобуслар чақиртирилган. Қаршилик қилган фуқароларни дўппослаш ҳолатлари ҳам кузатилган.
Полиция фуқароларни маҳаллий бошқармага олиб борган ва улар билан тушунтириш олиб борган. Кейинчалик барча намойишчилар қўйиб юборилгани маълум қилинган.
Намойишчилар Исроил консуллик биноси эшикларга Ғазодаги урушни тўхтатишга чақирувчи ёзувларни ва эълонлар илган. Тель-Авив расмийларини Тинч аҳолини нишонга олишдан тийилишга чақирган.
Исроилнинг Сан-Францискодаги бош консули Марко Сермонетанинг айтишича, намойишчилар эрталаб соат 9:00 атрофида муассаса атрофида тўплана бошлаган. Шундан сўнг ташкилот ходимлари ҳужум содир бўлиши эҳтимолини инобатга олиб, полицияга хабар берган.
Изоҳ (0)