Швейцария Миллий кенгаши депутатлари Фаластин давлатини тан олиш таклифини қўллаб-қувватламади. Унинг тан олиниши учун 61 та, қарши бўлиб эса 131 та овоз берилди.
Бу ҳақда парламент матбуот хизмати маълум қилди.
“Миллий кенгаш Фаластинни тан олишни истамайди. Сешанба куни у Цюрихдан социал-демократик партия (СДП) депутати Фабиан Молина тақдим этган тегишли ташаббусни рад этди”, — дейилади баёнотда.
Молина “Миллий кенгаш 2023 йил 7 октябрда ҲАМАС томонидан ўғирлаб кетилган ва гаровга олинганларни озод қилиш шарти билан Фаластинни 1967 йил чегараларидаги давлат сифатида тан олиши” кўрсатилган резолюция лойиҳасини тасдиқлашни таклиф қилди. У ўз нутқида Ирландия, Испания ва Норвегия яқинда Фаластинни давлат сифатида тан олганини эълон қилганини эслади. Депутатнинг фикрича, Фаластинни Исроил билан бирга тан олиш “минтақада тинчлик ва барқарорликни мустаҳкамлашга ёрдам беради ҳамда Исроил-Фаластин можаросининг адолатли ва доимий ечимига ёрдам беради”.
БМТнинг инсон ҳуқуқлари бўйича экспертлари 3 июнь куни барча давлатларни Фаластин давлатини тан олишга чақирди. Бу позиция уларнинг Женевада чоп этилган баёнотида баён этилган.
Унда айтилишича, Фаластиннинг тан олиниши “Фаластин халқи ҳуқуқлари, унинг озодлик ва мустақиллик учун кураши ва изтиробларининг муҳим тасдиғидир” ва барча давлатлар уни тан олганини эълон қилган 146 давлатдан ўрнак олиши керак.
Изоҳ (0)