“Барселона” 2017 йилда Мбаппени харид қилиш имкониятидан воз кечиб, Дембелега эътибор қаратгани маълум бўлди

Собиқ агент Хосеп Мария Мингеля Килиан Мбаппе “Барселона”га ўтиши мумкин бўлгани ҳақида гапириб ўтди.

Кеча “Реал” Мбаппе билан шартнома имзолаганини расман эълон қилди.

“Францияда бўлиб турган ўғлим “Монако” ўз футболчиларини сотаётганини аййтди. Шунда мен унинг (Мбаппе) ота-онаси билан гаплашдим. Йигитча 18 ёшда эди ва Неймарнинг Каталонияни тарк этиши фонида “Барселона”га ўтишга розилик берганди. Бу ҳақида “Барселона”га хабар бергандим. Лекин улар бундай нархга яхшиси Дембелени харид қилишини айтган. Ўша пайтда раҳбариятни “Боруссия Д”да тўп сураётган Усмон кўпроқ қизиқтирганди. Бу жуда қисқа, аммо қайғули ҳикоя.

“Барселона” ҳозир молиявий қийинчиликларни бошдан кечирмоқда. Унинг устида Флорентино Перес бошчилигидаги “Реал” кундан кунга янада кучайиб бормоқда”, — дейди Мингеля.

Мбаппе 2017 йилда “Монако”дан “ПСЖ”га ижара асосида ўтган эди. 2018 йилда парижликлар футболчининг трансферини тўлиқ сотиб олган. 7 мавсум давомида футболчи 256 та гол билан клуб тарихида энг яхши тўпурарга айланди. 

Жамоа билан биргаликда 6 марта Франция чемпионлигини, 4 марта Франция Кубогини, 3 марта Франция Суперкубогини, 2 марта Лига Кубогини қўлга киритди.