Америкада миллиардер Илон Маскга тегишли Neuralink компаниясининг чипи миясига ўрнатилган биринчи бемор — Нолан Арбо ҳаёти қандай ўзгарганини Business Insider нашрига гапириб берди.
Бемор чипдан деярли ҳар куни эрталаб соат 07:00 дан кечги 23:00 гача фойдаланади. Нейрокомпьютер интерфейси мутахассислари билан машғулотлар кунига саккиз соатгача давом этади.
Мен бундан завқлансам-да, уни мушкул вазифа деб ҳисобламайман, — дейди эркак. Мазкур машғулотлар чипдаги хатоликларни аниқлаш ва уларни бартараф этиш учун керак.
Чипнинг ўзи махсус дастур орқали Bluetooth ёрдамида компьютерга уланади. Арбо курсорни фикр кучи билан бошқариб, ижтимоий тармоқларда мулоқот қила олади, электрон почта хабарларига жавоб беради, комикслар ўқийди ва сайт орқали япон тилини ўрганади.
Арбо қурилмадан фойдаланиш пайтида бир марта ухлаб қолгани, шунга қарамай курсор ҳаракатланишда давом этганини айтган.
Тахминан беш дақиқа ухлаб қолдим ва уйғонганимда компьютерда ўнга яқин турли хил иловалар очиқ турарди. Бунинг олдини олиш учун курсорни ўчириб қўйиш мумкин, — дейди у.
Эркакнинг сўзларига кўра, чипни имплантация қилиш унга ҳаёт сифатини яхшилаш, “дунё билан қайта боғланиш”, ижтимоий алоқаларни тиклаш, эркин бўлиш ва мақсадларга эришиш имконини берган.
Ўзимни аҳамиятли иш қилаётгандек ҳис қиламан. Ҳар кунги ишларим бундан кейин одамларга таъсир қилишини ҳис қиламан, бу доимий равишда қувноқ кайфиятда бўлишим учун етарлидир, — дейди Арбо.
Операциядан бир ой ўтиб, имплантнинг алоқаларида бузилишлар кузатилган, бунинг таъсирида маълумотлар узатиш билан ҳам муаммо юзага келган. Қурилмани олиб ташлаш эҳтимоли бўлган, бироқ бемор буни истамаган.
30 ёшли Арбо саккиз йил олдин сувга сакраш чоғида бошидан шикастланиб, елкасидан пасти фалаж бўлиб қолган. Neuralink компанияси 2024 йил январида унинг миясига нейрочип ўрнатган. Эркак февраль ойига келиб, курсорни бошқаришни ўрганганини маълум қилган.
Изоҳ (0)