Мексикада ҳукмрон Morena партиясидан номзод Клаудия Шейнбаум, экзитпол натижаларига кўра, президентлик сайловларида ғалаба қозонмоқда. Бу ҳақда Euronews хабар берди.
Клаудия Шейнбаум 57 фоиздан ортиқ овоз билан Мексикадаги президентлик сайловларида етакчилик қилмоқда. Мексика Марказий сайлов комиссиясининг якуний сайлов натижалари 5—8 июнь кунлари эълон қилинади.
Гендер зўравонлик кенг тарқалган ва аёллар фақат 1953 йилдагина овоз бериш ҳуқуқига эга бўлган мамлакатда ижро ҳокимиятини илк марта аёл киши бошқариши кутилмоқда, — дейилади хабарда.
Конституцияга кўра, амалдаги давлат раҳбари Андрес Мануэль Лопес Обрадор иккинчи олти йиллик муддатга қайта сайлана олмайди. 2 июнь куни бўлиб ўтган сайлов участкаларида хавфсизликни таъминлаш учун 27 минг аскар ва Миллий гвардия ходимлари сафарбар қилинган.
Наркокартеллар ва бошқа жиноий ташкилотлар сайловдан кейин ҳам ўз таъсирини сақлаб қолиш умидида барча партияларнинг номзодларига босим ўтказмоқда.
EL PAIS Mexico нашрига кўра, сайловолди ташвиқоти давомида турли лавозимларга номзод бўлган 37 нафар иштирокчи ҳалок бўлган. Laborаtоriо Electoral маълумотларига кўра, ўтган йили сиёсатчиларга нисбатан жами 320 дан ортиқ ҳужумлар содир этилган.
Изоҳ (0)