АҚШ президенти Жо Байден агар ҲАМАС гаровда ушлаб турилган исроилликларни озод қилса, Ғазода ўт очишни тўхтатишга “эртагаёқ” эришиш мумкинлигини айтганди. Фаластиннинг ҲАМАС ҳаракати мазкур таклифга жавоб қайтарди. Бу ҳақда Аl Arabiya хабар берди.
ҲАМАС ҳаракатининг баёнотига кўра, Байденнинг мазкур таклифи музокаралар учун “тўсиқ” бўлади.
Биз АҚШ президентининг бу позициясини қоралаймиз. Буни воситачилар томонидан илгари сурилган таклифга ҲАМАС розилик билдиришига олиб келган музокараларнинг сўнгги раунди натижаларидан чекиниш деб биламиз, — дейилади баёнотда.
Май ойининг бошида ҲАМАС халқаро ҳамжамиятнинг Ғазода ўт очишни тўхтатиш тўғрисидаги таклифини қабул қилди. ҲАМАС етакчиси Исмоил Ҳания 6 март куни Қатар бош вазири ва Миср разведка хизмати раҳбари билан телефон мулоқотида бунга рози бўлган.
Таклиф қабул қилинган куни Исроил ҳарбийлари Ғазо секторининг жанубидаги Рафаҳнинг шарқий ҳудудларида ҳарбий амалиётлар бошлади. У ерда яшаётган айрим фаластинликлар Ғазонинг шимолий ва марказий қисмига қочишга мажбур бўлди. Исроил бош вазири идораси гаровга олинганларни озод қилиш масаласида ҲАМАСга босим ўтказиш учун Рафаҳдаги амалиётни давом эттиришга бир овоздан қарор қилган.
Бундан ташқари, Исроил ҳарбийлари Ғазога гуманитар ёрдам етказилишига имкон берувчи — Рафаҳ ва Керем Шалом назорат-ўтказиш пунктининг Фаластин қисмини эгаллаб олган. ҲАМАСнинг айтишича, Исроил бош вазири Биньямин Нетаньяху Рафаҳга ҳужум уюштириб, музокараларни издан чиқаришга шошган.
Изоҳ (0)