АҚШ президенти Жо Байден Ғазо секторида ўт очишни тўхтатиш шартини айтди. Бу ҳақда Deutsche Welle хабар берди.
Байден агар ҲАМАС гаровда ушлаб турилган исроилликларни озод қилса, Ғазода ўт очишни тўхтатишга “эртагаёқ” эришиш мумкинлигини айтди. У тегишли нутқни 11 май куни Вашингтондаги сайловолди кампанияси тадбирида билдирди.
Washington Post газетасининг ёзишича, АҚШ Исроилга Рафаҳ шаҳрига кенг кўламли ҳужумдан воз кечишни таклиф қилган. Бунинг эвазига АҚШ яҳудий давлатига ҲАМАС етакчиларини топишда ёрдамлашишни, Ғазо секторидаги ҲАМАС туннеллари схемаларини беришни ваъда қилган.
АҚШ ҳукумати Исроил армиясининг бир миллионга яқин фаластинлик яшайдиган ва бошпана сифатида фойдаланаётган Рафаҳ шаҳрига бостириб киришига йўл қўймасликка ҳаракат қилмоқда. Аммо Исроил ташқи босимларга қарамай, Рафаҳдаги ҳарбий операция давом этишини билдирган.
Исроил ҳарбийлари Рафаҳнинг шарқий қисмида ҲАМАС назоратидаги нишонларга аниқ зарбалар бераётганини айтмоқда. ҲАМАС етакчиси Исмоил Ҳания ўт очишни тўхтатиш сулҳига розилик билдирган. Бироқ Исроил бош вазири Биньямин Нетаньяху буни “ҳийла” деб баҳолаб, унга қаршилик кўрсатган.
Изоҳ (0)