Афғонистоннинг Нангарҳор вилоятида 1 июнь куни дарёда қайиқ чўкиб кетиши оқибатида камида 20 киши ҳалок бўлди. Бу ҳақда АВА Пресс нашри хабар берди.
Манбада айтилишича, бахтсиз ҳодиса Нангарҳор вилоятининг Моҳмандара туманида рўй берган. Йўловчилар қайиғи носоз ҳолатда бўлгани боис чўкиб кетган.
“Толибон” ҳукуматининг Нангарҳор вилоятидаги Ахборот ва маданият департаменти 1 июнь куни ҳодиса юзасидан махсус ахборот бюллетени чоп этган. Унда ҳалок бўлганлар орасида аёллар ва болалар ҳам борлиги маълум қилинган.
Айрим маҳаллий манбалар кўнгилсиз ҳодиса Моҳмандара туманининг Базел деб аталган ҳудудида содир бўлганини билдирган. Ҳалокатга учраган қайиқда 25 йўловчи бўлган, уларда фақат 5 киши сувдан тирик чиққан.
Базел ҳудудида дарёни кесиб ўтишга имкон берадиган кўприк йўқлиги хабар берилган. Маҳаллий аҳоли шу боисдан ҳам кўпинча уни қайиқларда сузиб ўтади.
Расмийлар ҳодисада омон қолганларга ёрдам кўрсатилаётганини маълум қилган. Нангарҳор вилояти маъмурияти ҳалок бўлганлар оилаларига ҳамдардлик билдирган.
Изоҳ (0)