Тежамкорми ёки зиқна: бир цент учун талашадиган Голливуд юлдузлари (фото)

Қуйида Голливуднинг энг тежамкор миллионерлари, ҳар бир кичик нарсани ҳам қадрлашни биладиган актёрлар рўйхатини тақдим этамиз.

Том Круз

Том Круз Голливудда нафақат машҳур “Уддалаб бўлмас топшириқ” франшизасининг юзи, балки зиқналиги кўплаб суҳбатлар мавзусига айланган одам сифатида ҳам танилган. “Сўнгги самурай” фильмининг суратга олиш ишлари тугагандан сўнг, катта гонорар олган актёр компанияга ғалати даъво билан чиқади.

Круз суратга олиш ишлари сабаб семиргани туфайли севимли кийимларини кия олмаганини таъкидлаб, киностудиядан 200 минг доллар товон пули талаб қилган. Студия унинг катта гонорар олганини эслатиб, товон пули тўлашдан бош тортади. Бу воқеа гарчи кенг жамоатчилик эътиборини тортмаган бўлса-да, хотираларда кулгили воқеа сифатида сақланиб қолади.

Линдси Лоҳан

Ўтмишда Disney юлдузи сифатида танилган Линдси Лоҳан ҳозирда бош ролларнинг катта рўйхати ёки йирик кино лойиҳаларидаги иштироки билан мақтана олмайди. Бироқ машҳурлик даврида у катта бойлик тўплашга муваффақ бўлган ва ҳозирда тунги клублар тармоғига эгалик қилади.

Шунга қарамай, Лоҳан Голливудда жуда тежамкор инсон сифатида машҳур. У кўпинча ресторан ва гўзаллик салонларидаги хизмат учун пул тўламай кетади. Ушбу хатти-ҳаракати туфайли кўплаб гўзаллик салонлари уни ҳатто қора рўйхатга киритган.

Дуэйн Жонсон

Илгари рестлер сифатида танилган Дуэйн Жонсон ҳозирда Голливуддаги энг муваффақиятли ва 2021 йилга келиб эса энг бой актёрлардан бири ҳисобланади. У бир неча бор зиқналиги, айниқса меҳмонхона ва ресторанларда чойчақа қолдиришни истамаслиги учун танқид қилинган. Бир марта Жонсон ҳатто чойчақа учун пули йўқлигини айтиб, официантдан қайтимини сўраган.

Бир куни Жонсон ёлғиз ўзи маза қилиб стейк ейиши учун ресторанни эрта очишни сўрайди. Ресторан унинг илтимосини бажаради ва иш куни бошланишидан олдин юқори сифатли хизмат кўрсатади, бироқ миннатдорлик белгиси сифатида актёр бор-йўғи 7 доллар чойчақа қолдиради. Бу эса унга хизмат кўрсатган официантнинг ҳафсаласини пир қилади ва машҳур шахс ҳақидаги тасаввурини ўзгартиради.

Брюс Уиллис

Бир пайтлар шон-шуҳрат чўққисида бўлган Брюс Уиллис пул сабаб иккинчи пландаги фильмларда ҳам суратга тушган. Карьерасидаги бундай бурилишнинг асосий сабабларидан бири — бу одатдаги даромад даражасини сақлаб қолиш истаги. “Чегарасизлар 3” фильмидан олдин содир бўлган воқеа кўпинча унинг очкўзлигига мисол сифатида келтирилади.

Брюс Уиллис суратга олиш майдончасидаги тўрт кунлик иш учун унга таклиф қилинган уч миллиондан фарқли равишда тўрт миллион доллар талаб қилади. Актёрлар таркибида бошқа юлдузлар борлигини инобатга олган ҳолда бундай илтимос ҳаддан ташқари кўринарди. Сильвестр Сталлоненинг реакцияси дарҳол ва ҳал қилувчи бўлади: жанжалдан уч кун ўтгач, Уиллис ўрнига Ҳаррисон Форд келади. Сталлоне очиқчасига Уиллисни “дангаса ва очкўз” деб атайди, бундай хатти-ҳаракат унинг карьерасига салбий таъсир кўрсатиши мумкинлигини таъкидлайди.

Кетрин Ҳейгл

Кетрин Ҳейгл Голливудда анчадан бери истеъдодли, аммо характери оғир актриса сифатида танилган. Бу унинг фильмларда камроқ суратга тушишининг сабабларидан биридир. 1990—2000 йилларда Ҳейгл романтик комедияларда фаол иштирок этган, бироқ кейинчалик карьераси пасайишни бошлаган.

Кўпчилик актриса ҳаддидан ошиб кетган деб ҳисоблайди, чунки у гонорарини сезиларли даражада оширган. Карьерасидаги муҳим лаҳза бошқа машҳур актёрлар қаторида ўйнаши керак бўлган “Севишганлар куни” фильмида роль таклиф қилинганида содир бўлади. Ҳейгл роли учун уч миллион доллар сўрайди. Бу воқеа унинг кинодаги мавқейини янада ёмонлаштиради.