“Толибон” расмийлари 30 май куни Хост ва Ғазни вилоятларида 11 нафар фуқарони омма олдида қамчилади. Бу ҳақда Atlas Press нашри хабар берди.
“Толибон” Олий суди ушбу хабарни тасдиқлаган. Фуқаролар қамчиланиши сабаблари, уларга қўйилган айбловлар маълум қилинмаган.
Олий суд пайшанба куни ахборот бюллетени нашр этган. Унда айтилишича, фуқароларнинг ҳар бири 20 дан 39 даррагача қамчиланган.
Афғонистон маҳаллий нашрлари тарқатган хабарга кўра, қамчиланган фуқароларнинг 10 нафари Хост ва яна 1 нафари Ғазни вилоятларидан бўлган. Хостдаги “Толибон” суди айбланувчиларни олти ойдан уч йилгача қамоқ жазосига ҳукм қилган.
Сўнгги пайтларда халқаро инсон ҳуқуқлари ташкилотлари “Толибон” раҳбариятига мурожаат қилиб, инсон ҳуқуқларини ҳурмат қилиш ва дала жазосини тақиқлашга чақирган. “Толибон” халқаро чақириқларни қисман қондирган бўлса-да, қамчилаш жазо усулини бекор қилмади.
Изоҳ (0)