Ўзбекистонда “Фуқароларнинг ўзини ўзи бошқариш органлари тўғрисида”ги қонун янги таҳрирда ишлаб чиқилади. Бу ҳақда президентнинг “Ўзбекистон маҳаллалари уюшмаси фаолиятини йўлга қўйиш ва маҳаллаларда бошқарув тизимини такомиллаштиришга оид қўшимча чора-тадбирлар тўғрисида”ги қарорида белгиланди.
Қарорда келтирилишича, қонун лойиҳаси маҳалла тизимида амалга оширилаётган ислоҳотлардан келиб чиқиб Ўзбекистон маҳаллалари уюшмаси ва манфаатдор вазирлик ва идоралар билан биргаликда 2024 йил 1 мартга қадар ишлаб чиқилиши лозим.
Янги таҳрирдаги қонунда қуйидагилар назарда тутилиши режалаштирилган:
- “маҳалла еттилиги”нинг ўзаро ҳамкорликда ишлаш механизмлари ҳамда уларнинг коллегиал масъулияти ва жавобгарлиги доирасини аниқ белгилаш, маҳалла раисининг уларнинг саъй-ҳаракатларини бирлаштириш ва йўналтириш, рағбатлантириш ва интизомий жазолаш бўйича ваколатларини мустаҳкамлаш;
- маҳалла томонидан жисмоний шахслардан олинадиган мол-мулк солиғи ва ер солиғи бўйича оширилган коэффициентлар қўллаш юзасидан тегишли халқ депутатлари Кенгашларига таклиф киритиш;
- “маҳалла еттилиги” таркибидаги лавозимларга тайинлашда ушбу маҳаллада яшовчи номзодларга устуворлик бериш;
- маҳалла раисининг сўровига жавоб бермаслик ёки тақдимномасида қўйилган масалани кўриб чиқмаслик учун жавобгарлик белгилаш;
- халқ депутатлари туман (шаҳар) кенгашларига маҳалла раислари ўз фаолиятида жиддий хато ва камчиликларга йўл қўйганда, уларга нисбатан ишончсизлик билдириш ва ушбу масалани кўриб чиқиш ваколатларини бериш ва бошқалар.
“Фуқаролар йиғини раиси сайлови тўғрисида”ги қонуннинг ҳам янги таҳрири лойиҳаси ишлаб чиқилади. Унда маҳалла раиси сайловини аҳоли томонидан умумий, тенг, тўғридан тўғри сайлов ҳуқуқи асосида яширин овоз бериш орқали ўтказиш, маҳалла раисининг маълумоти (олий) ва малакаси бўйича қўйиладиган талаблар, маҳалла раисининг ваколат муддатини 3 йилдан 5 йил муддатга узайтириш ва бошқалар назарда тутилади.
Изоҳ (0)