АҚШ Давлат котиби Энтони Блинкен Киевга келди ва бу сафар Вашингтондан Украинага ҳарбий ёрдам кўрсатиш масалаларини муҳокама қилмоқчи. Бу ҳақда тегишли манбаларга таяниб, Reuters хабар берди.
Манбага кўра, Блинкен Киевга “эълон қилинмаган ташриф билан” поездда келган. Исмини ошкор этмаган АҚШ маъмурияти вакилининг сўзларига кўра, Блинкен ўз ташрифи чоғида Киев “мудофаасини кучайтириш” ва “жанг майдонида ташаббусни қайта қўлга киритиш” учун АҚШ қурол-яроғидан қандай фойдаланишни муҳокама қилмоқчи.
Reutersъга кўра, Блинкен Украинанинг бир қанча расмийлари, жумладан, мамлакат президенти Владимир Зеленский билан учрашмоқчи. Ушбу маслаҳатлашувлар чоғида у АҚШ томонидан Украина доимий қўллаб-қувватланишини эълон қилмоқчи.
Аввалроқ АҚШ Киевга 400 миллион доллар миқдорида ҳарбий ёрдам юбориши айтилган эди. Пентагон маълумотларига кўра, Байден президентлигининг бошидан бери Қўшма Штатлар Украинага хавфсизлик учун 51,3 миллиард доллардан ортиқ маблағ ажратган.
Апрель ойи охирида Байден Украина учун 61 миллиард долларлик ёрдам пакетини имзолаган эди. Давлат раҳбари ушбу қонун лойиҳаларини имзолаганидан сўнг Пентагон Украинага 1 миллиард долларлик қурол-яроғ ва техника жўнатаётганини эълон қилган.
Изоҳ (0)