AQSH Davlat kotibi Entoni Blinken Kiyevga keldi va bu safar Vashingtondan Ukrainaga harbiy yordam ko‘rsatish masalalarini muhokama qilmoqchi. Bu haqda tegishli manbalarga tayanib, Reuters xabar berdi.
Manbaga ko‘ra, Blinken Kiyevga “eʼlon qilinmagan tashrif bilan” poyezdda kelgan. Ismini oshkor etmagan AQSH maʼmuriyati vakilining so‘zlariga ko‘ra, Blinken o‘z tashrifi chog‘ida Kiyev “mudofaasini kuchaytirish” va “jang maydonida tashabbusni qayta qo‘lga kiritish” uchun AQSH qurol-yarog‘idan qanday foydalanishni muhokama qilmoqchi.
Reuters’ga ko‘ra, Blinken Ukrainaning bir qancha rasmiylari, jumladan, mamlakat prezidenti Vladimir Zelenskiy bilan uchrashmoqchi. Ushbu maslahatlashuvlar chog‘ida u AQSH tomonidan Ukraina doimiy qo‘llab-quvvatlanishini e’lon qilmoqchi.
Avvalroq AQSH Kiyevga 400 million dollar miqdorida harbiy yordam yuborishi aytilgan edi. Pentagon maʼlumotlariga ko‘ra, Bayden prezidentligining boshidan beri Qo‘shma Shtatlar Ukrainaga xavfsizlik uchun 51,3 milliard dollardan ortiq mablag‘ ajratgan.
Aprel oyi oxirida Bayden Ukraina uchun 61 milliard dollarlik yordam paketini imzolagan edi. Davlat rahbari ushbu qonun loyihalarini imzolaganidan so‘ng Pentagon Ukrainaga 1 milliard dollarlik qurol-yarog‘ va texnika jo‘natayotganini e’lon qilgan.
Izoh (0)