АҚШ давлат котиби Энтони Блинкен Россиянинг Украинада бошлаган уруши Кремль томонидан тузилган ҳарбий стратегиянинг ҳалокатга учраганини англатишини маълум қилди. Бу ҳақда Anadolu нашри хабар берди.
Манбада айтилишича, АҚШ давлат котиби Блинкен Саудия Арабистони пойтахти Ар-Риёддаги Жаҳон иқтисодий форумида 29 апрель куни нутқ ўқиган. Унда Россиянинг ҳарбий агрессиясини қаттиқ танқид қилган.
Блинкенга кўра, Москванинг Донбассдаги ҳаракатлари, аслида, стратегик ҳалокат. Мамлакат ўз сиёсий режаларини амалга оширишнинг уддасидан чиқа олмагач, қўлига қурол олишга қарор қилган.
“Россия иқтисодий ва ҳарбий жиҳатдан биз ўйлаганимиздан кўра заифроқ эканини кўрсатди. Ҳарбий агрессия улар учун ғалаба сари эмас, ҳалокат сари йўл”, — деган АҚШ расмийси.
Блинкен, шунингдек, украин халқининг Россия ҳужуми арафасида ўзаро уюшганига катта баҳо берган. Бу бирдамлик мамлакатни қутқаришига умид билдирган.
АҚШ давлат котиби Саудия Арабистони пойтахтида туриб, Россия қурол етказиб бераётгани тахмин қилинаётган Хитой, Эрон ва Шимолий Корея раҳбариятларига мурожаат қилган. Уларни кескинликни кучайтиришдан тийилишга чақирган.
Изоҳ (0)