Эстония бош вазири Кая Каллас Украинада уруш бошланганидан кейин ҳам турмуш ўртоғининг компанияси Россиядаги фаолиятини давом эттиргани учун узр сўради.
“Бундан хафа бўлган барчадан, албатта, узр сўрайман, лекин ўзимнинг маънавий баҳоларим учун жавоб бераман. Мен ҳалиям кенг кўламли уруш ҳолатида Россия билан муносабатларни сақлаб қолиш маънавий нуқтаи назардан нотўғри деб ҳисоблайман. Буни тўхтатиш керак, барча Эстония бизнесларини шундай қилишга чақираман”, — деди у.
Калласнинг айтишича, эри ўз компаниясидаги улушини “сэндвич нархида сотиб юборган” ва шу тариқа “жавобгарликни сўзда эмас, балки ҳаракатлар билан ўз зиммасига олган”.
Шу билан бирга, Каллас бош вазирликдан ўз ихтиёри билан истеъфога чиқиш нияти йўқлигини айтди, мухолифатга эса унга нисбатан ишончсизлик вотуми ташкил этишга уриниб кўришни таклиф қилди.
Эстония ҳукуматидаги можаро
Кая Каллас, Россиянинг Украинага босқинидан сўнг, доимий равишда Россияга нисбатан энг қатъий позицияни эгаллаб келади, у Москва билан алоқаларни бутунлай узиш тарафдори. Эстония Россия фуқароларига ўз ҳудудига киришни тақиқлади; мамлакатда кўплаб совет ёдгорликлари ҳам демонтаж қилинди.
24 август куни ОАВда Калласнинг эри Арво Ҳалликнинг Россияда бизнеси борлиги ҳақида хабарлар тарқалди. Маълум бўлишича, Каллас Россияда бизнес юритувчи Stark Logistic транспорт компаниясига қисман эгалик қилади. Компания уруш пайтида Россия таъминотидан деярли 1,5 миллион евро ишлаб топган. Ҳукумат раҳбари бу ҳақда билмаганини айтди, аммо президент Алар Карис жамоатчиликка тушунтириш беришни талаб қилди. Мухолифат эса бош вазир истеъфосини талаб қилмоқда.
Изоҳ (0)