Мукофот жамғармаси 2,5 миллиард сўм: “Ёшлар овози — Бўзатов фест”нинг республика босқичи бошланди

Танловнинг республика босқичи 10 —15 май кунлари Қорақалпоғистонда бўлиб ўтади ва унда ҳудудий босқичда ғолибликни қўлга киритган 158 нафар иштирокчи қатнашади. Бу ҳақда “Дарё” мухбири хабар бермоқда.

“Беш босқичли беш ташаббус” олимпиадаси доирасида “Бўзатов иқтидорларни кашф этади!” шиори остида ўтказилаётган танловнинг бу йилги мавсумида 248 минг нафардан ортиқ ёшлар Telegram’даги @YoshOvozbot орқали рўйхатдан ўтган.

Танлов маҳалла, сектор, туман (шаҳар), ҳудудий ва республика каби беш босқичдан иборат. Унда бахшичилик, анъанавий ижро, опера ҳамда эстрада йўналишида 3 та ёш (10-15 ёш, 16-22 ёш, 23-30 ёш) тоифасида номзодлар иштирок этди.

Танлов Низомига бир қатор ўзгартириш ва қўшимчалар киритилди. Жумладан, республика босқичи 2 босқичга бўлинди: финал ва супер финал.

Республика босқичида:

• 1-ўрин – 50 миллион сўмдан (тўрт йўналишда, жами 12 та);
• 2-ўрин – 30 миллион сўмдан (тўрт йўналишда, жами 12 та);
• 3-ўрин – 20 миллион сўмдан (тўрт йўналишда, жами 12 та).

Қолган барча иштирокчилар – 10 миллион сўмдан пул мукофоти билан тақдирланади. Танловнинг умумий мукофот жамғармаси 2,5 миллиард сўмни ташкил этади.