Инсон ўзи севган иши билан сидқидилдан шуғулланганда меҳнати яхши самара беради ва молиявий манфаат кўради. Айрим уй бекаларининг хоббиси ҳатто мўмай даромад ҳам келтириши мумкин. Қуйида уй бекасидан ишбилармонга айланган ажойиб аёллар ҳикоялари билан бўлишамиз.
Бетт Грэмм
90 йиллар бошида ручкани ўчирувчи махсус нарса ихтиро қилинмаган эди. Ёзувдаги хатони тўғрилашнинг ягона усули — уни қайта печатлаш машинасида ёзиш эди. Ажримдан сўнг Ҳьюстондан нотаниш шаҳар — Далласга кўчиб келган Бетт котиба-ёзувчи сифатида иш бошлади. Унинг вазифаси ёзув машинасида турли ҳужжатларни ёзиш бўлган. Иш кунларининг бирида Грэмм lawful (қонуний) сўзининг ўрнига awful (ёмон) деб адашиб ёзиб қўйди. Хатони тўғрилашга эса узоқ вақт кетарди. Эртаси куни у офисга эмульсияли оқ бўёқ ва чўтка билан кириб келди.
Корректорлик иши бўйича илк тажриба бесамар бўлгач, Бетт бўёққа туз, сув, сода каби кимёвий маҳсулотлар қўшиб, тажриба қила бошлади ва натижага эришди. Шу тариқа “liquid paper” — ручкани ўчирувчи корректор-бўёқ ихтиро қилинди. Корректор-бўёқ кейинчалик такомиллаштирилиб, ишлаб чиқарилиш йўлга қўйилди. Фарзандини ёлғиз катта қилаётган она шу тариқа молиявий ташвишсиз кексалик ва ўғли учун порлоқ келажакка пойдевор қурди.
Жой Мангано
Ушбу аёлнинг тақдири “Жой” номли фильм эфирга узатилгандан сўнг кенг жамоатчиликка маълум бўлган. Турмуш ўртоғи билан ажрашган Мангано кичкина квартирада уч фарзанди билан ёлғиз яшар эди. Бир куни Жой тасодифан шиша идишни синдириб қўяди ва ердаги шиша парчаларини тозалаш вақтида қўлини шикастлайди. Шунда аёлнинг хаёлига ажойиб фикр келади ва Мангано сувини сиқиш учун қўллар билан пол латтага тегинишга ҳожат бўлмаган Мiracle моp номли полювгич ўйлаб топади.
Орадан бир неча ой ўтиб эса Жой рўзғор буюмлари ўрин олган дўкон очди. Телеэкран орқали ўз маҳсулотининг афзалликлари ҳақида айтиб берганидан кейин 18 минг дона полювгич сотишга муваффақ бўлди. 2 йил ўтиб эса йиллик даромади 1 миллион долларни ташкил қиладиган компания эгасига айланган.
Фото: Marie Claire
Шери Шмельцер
Шери исмли аёл миллион долларлик ғояни кутилмаганда ўйлаб топган. Унинг фарзандлари тешикли шиппакларни яхши кўрарди. Аёл болаларининг пойабзалларини қизиқарли бўлишини истаб, тешикларни турли предметлар: гул, тугма ва лойдан ясалган шакллар билан безаган. Болалари мактабга кийиб борганидан кейин пойабзаллар бошқа ўқувчиларга ҳам ёқиб қолган ва уларнинг ота-оналари шиппакларини худди шундай безаб беришни илтимос қилган.
Шери ижод намуналарини жиббитс деб номлади ва кейинчалик ертўлада ўзининг кичик ишлаб чиқариш цехини очади. Аввалига донаси 3 долларга сотилган жиббитслар бир неча йил ўтиб бутун дунёга машҳур бўлиб кетди. Шмельцер эса ўз маҳсулотини Crocs компаниясига 20 миллион доллар эвазига сотиб юборди.
Жули Дин
Буюк Британиянинг Тhе Cambridge Satchel Company бренди ташкил этилганига 10 йилдан ошмаган. Мазкур компания портфель кўринишидаги сумкалар ишлаб чиқаради. Cambridge satchel номли сумка ғояси уй бекаси Жули Динда пайдо бўлган. Молиявий қийинчиликни бошидан ўтказаётган ва фарзандларини ёлғиз тарбиялаётган она янги сумка чизмасини ишлаб чиқади ва ўзи танлаган ательеда сумкани чарм матодан тиктиради. Аввалига портфелни интернет дўконларда мактаб ўқувчилар учун сота бошлайди.
Кейинроқ Жули савдони мактаб аудиторияси билан чекламасликка қарор қилди ва мода блогерларига мурожаат қилади. У ўзининг янги бренди ҳақида тавсифнома ва жозибали фотосуратларни ўз ичига олган хатни ёзиш учун кўп вақт сарфлади. Хатда у агар сумкалар мақул келса, расм ўрнига ҳақиқий портфелларни юборишини ваъда қилади. Ва унинг орзуси амалга ошади: New York Fashion Week—2011 арафасида Elle UK муҳаррирлари Жулига жавоб беради ва сумкаларнинг бир нечта намуналарини тақдим этишни сўраб мурожаат қилади. Мода ҳафталигида кўргазмага қўйилган сумкалар кўплаб мода ихлосмандларига мақул бўлади ва Жули машҳур бренд билан шартнома тузади. Ҳозирда Cambridge satchel сумкаси 10 га яқин давлатларда сотувга қўйилган.
Изоҳ (0)