Инсон танасининг асосий қисми сувдан иборат бўлса-да, ортиқча суюқлик тўпланиб қолиши турли касалликларга олиб келади. Одатда, организмдаги сув нафас олиш, тери ва сийдик билан танадан чиқиб кетади, бироқ баъзи ҳолларда суюқлик ҳужайра тўқималарида ҳам қолиб кетиши мумкин. Ортиқча сув тўпланишининг белгиларига:
- тўсатдан вазн ортиши;
- оёқ ва юз соҳасининг шишиши;
- қорин ҳажмининг каттариши;
- нафас олишда қийналиш кабилар киради.
Танада ортиқча суюқлик тўпланиш сабаблари
Ҳайз даврида гормонал ўзгаришлар. Организмдаги прогестерон ва эстроген даражасидаги ўзгаришлар суюқлик қолиб кетишига сабаб бўлиши мумкин. Бу одатда ойда бир марта, ҳайз кўришдан аввал содир бўлади ва саломатликка хавф солмайди.
Дори-дармонларни қабул қилиш. Қандли диабетга қарши дорилар, қон босимини туширувчи препаратлар, ибупрофен каби оғриқ қолдирувчилар ҳамда эстрогенлардан шиш пайдо бўлиши мумкин.
Саёҳат. Инсон узоқ вақт ўтирганда оёқлари шишиб кетади. Бу ҳам соғлиқ учун хавфли эмас ва даволанишсиз ўзи ўтиб кетади. Истисно қилиб самолёт парвозидан кейинги шишни айтиш мумкин. У бир неча соат ёки кун давомида сақланиб қолади ва оёқларда оғриқ кузатилади. Бундай аломатлар чуқур томир тромбозидан дарак бериши мумкин.
Ҳомиладорлик. Ҳомиладор аёллар танасида кўпинча суюқлик тўпланиб қолади. Уларнинг оёқлари, қўллари ва юзлари шишади, бошқа жиддий аломатлар бўлмаса, бундай шиш нормал ҳисобланади.
Кўп туз истеъмол қилиш. Ош тузи 40 фоиз натрийдан иборат бўлиб, организмдаги ҳужайрадан ташқари суюқлик ҳажмини сақлайдиган минералдир. Шунинг учун ортиқча туз ҳам шиш келтириб чиқаради.
Узоқ муддатли тик ҳолатда қолиш. Агар инсон узоқ вақт туриб қолиши ёки кўп юриши керак бўлса, суюқлик оёқларда тўпланиб, шиш пайдо бўлади.
Қачон шифокорга мурожаат қилиш керак?
Агар шишишдан ташқари, нафас қисилиши, юрак ритмининг бузилиши ва кўкрак қафасида оғриқлар пайдо бўлса, зудлик билан тез ёрдам чақиринг. Бу ўпкада суюқлик тўпланишининг белгиси бўлиши мумкин.
Танадаги ортиқча суюқликни бартараф этиш йўллари
Агар сизда шишлар камдан-кам ҳолларда юзага келса ва маълум вақтдан сўнг ўзи ўтиб кетса, унинг олдини олиш ва асоратларини камайтириш мумкин. Бунинг учун:
- туз истеъмолини камайтиринг;
- фаст-фуд ва тузли газаклар еманг;
- кўпроқ сабзавот ва мевалар истеъмол қилинг;
- жисмонан фаол бўлинг;
- маълум вақт оёқларни кўтарган ҳолатда ётинг;
- оёқ ва қўллар учун махсус компрессион қўлқоп ёки боғламдан фойдаланинг;
- шиш бор зонани уқаланг.
Изоҳ (0)