“Муҳтож шахсларни протез-ортопедия мосламалари ва реабилитация қилишнинг техник воситалари билан таъминлаш тартиби тўғрисидаги низомни тасдиқлаш ҳақида”ги Вазирлар Маҳкамаси қарори қабул қилинди.
Қарор билан қуйидагилар белгиланди:
- ваучер тизими жорий этилмаган ҳудудларда муҳтож шахсларни протез мосламалари ва реабилитация воситалари билан сертификат тизими асосида таъминлаш тартиби сақлаб қолинади;
Маълумот учун, президент қарорга кўра, 2024 йил 1 майга қадар Тошкент шаҳри ва Самарқанд вилоятида, 2024 йил 1 октябрга қадар республиканинг бошқа барча ҳудудларида муҳтож шахсларни протез мосламалари ва реабилитация воситалари билан ваучер асосида таъминлаш тартиби жорий этилади.
- протез мосламалари ва реабилитация воситалари “Ягона миллий ижтимоий ҳимоя” ахборот тизимида юритиладиган Протез-ортопедия мосламалари ва реабилитация қилишнинг техник воситаларини сотувчи тадбиркорлик субъектлари реестрига киритилган тадбиркорлик субъектлари томонидан ваучерга мувофиқ реализация қилинади. Бунда, протез мосламалари ва реабилитация воситалари учун давлат томонидан муҳтож шахсларга қоплаб бериладиган маблағлар ваучер асосида Рейестрга киритилган тадбиркорлик субъектларига ўтказиб берилади. Тадбиркорлик субъектларининг Рейестрга кирмаганлиги уларнинг протез мосламалари ва реабилитация воситаларини ишлаб чиқариш ёки сотиш фаолиятига тўсқинлик қилмайди;
- меҳнат вазифаларини бажариш билан боғлик ҳолда жароҳатланган, касб касалликларига чалинган ёки саломатликнинг бошқа хил шикастланиши туфайли етказилган зарардан жабрланган ходимлар протез мосламалари ва реабилитация воситалари билан ваучерга мувофиқ таъминланган ҳолларда, ваучер қийматига тенг маблағлар жавобгар бўлган иш берувчи маблағлари ҳисобидан республика бюджетининг тегишли шахсий ғазна ҳисобварағига ўтказилади. Агар моддий жавобгар бўлган иш берувчи маблағларни ўз ихтиёрига кўра бир ой муддат ичида қайтармаса, улар суд тартибида ундирилади.
Ҳужжат билан қуйидагилар тасдиқланди:
- қуйидагиларни назарда тутувчи Муҳтож шахсларни протез-ортопедия мосламалари ва реабилитация қилишнинг техник воситалари билан таъминлаш тартиби тўғрисидаги низом тасдиқланди:
- протез мосламалари ва реабилитация воситаларига муҳтожликни белгилаш ва уларга бўлган эҳтиёжни аниқлаш тартиби;
- протез мосламалари ва реабилитация воситаларини харид қилиш, етказиб бериш ва тўловларни тўлаш тартиби;
- протез мосламалари ва реабилитация воситаларини бошқасига алмаштириш тартиби.
Давлат томонидан кафолатланган тарзда таъминланадиган протез-ортопедия мосламалари ва реабилитация қилишнинг техник воситалари рўйхати. Бунда, муҳтож шахсларга протез мосламалари ва реабилитация воситаларини электрон тижорат орқали харид қилиши учун давлат томонидан рўйхат билан белгиланган миқдорларда тегишли маблағлар қоплаб берилади.
Ҳужжат Қонун ҳужжатлари маълумотлари миллий базасида эълон қилинган ва 2024 йил 1 майдан кучга кирди.
Бундан олдин Мудофаа, Ички ишлар, Фавқулодда вазиятлар вазирликлари, Миллий гвардия, ДХХ, Президент давлат хавфсизлик хизмати, Ҳарбий прокуратура, Божхона қўмитаси ва Электрон технологияларни ривожлантириш марказининг ватан ҳимояси ва эл-юрт тинчлиги йўлида яралангани, контузия ёки майиб бўлгани оқибатида ҳалок бўлган ҳарбий хизматчи ва ходимларининг оила аъзолари учун шифокорларнинг рецептларига асосан 3 ойлик эҳтиёжидан келиб чиқиб дори воситаларини (йилига бир марта), тиббий ва махсус протез ортопедия мосламаларини олиб берилиши ҳамда жарроҳлик амалиётларининг харажатларини қопланиши тўғрисида хабар берилганди.
Изоҳ (0)