“Muhtoj shaxslarni protez-ortopediya moslamalari va reabilitatsiya qilishning texnik vositalari bilan taʼminlash tartibi to‘g‘risidagi nizomni tasdiqlash haqida”gi Vazirlar Mahkamasi qarori qabul qilindi.
Qaror bilan quyidagilar belgilandi:
- vaucher tizimi joriy etilmagan hududlarda muhtoj shaxslarni protez moslamalari va reabilitatsiya vositalari bilan sertifikat tizimi asosida taʼminlash tartibi saqlab qolinadi;
Maʼlumot uchun, prezident qarorga ko‘ra, 2024-yil 1-mayga qadar Toshkent shahri va Samarqand viloyatida, 2024-yil 1-oktyabrga qadar respublikaning boshqa barcha hududlarida muhtoj shaxslarni protez moslamalari va reabilitatsiya vositalari bilan vaucher asosida taʼminlash tartibi joriy etiladi.
- protez moslamalari va reabilitatsiya vositalari “Yagona milliy ijtimoiy himoya” axborot tizimida yuritiladigan Protez-ortopediya moslamalari va reabilitatsiya qilishning texnik vositalarini sotuvchi tadbirkorlik subyektlari reyestriga kiritilgan tadbirkorlik subyektlari tomonidan vaucherga muvofiq realizatsiya qilinadi. Bunda, protez moslamalari va reabilitatsiya vositalari uchun davlat tomonidan muhtoj shaxslarga qoplab beriladigan mablag‘lar vaucher asosida Reyestrga kiritilgan tadbirkorlik subyektlariga o‘tkazib beriladi. Tadbirkorlik subyektlarining Reyestrga kirmaganligi ularning protez moslamalari va reabilitatsiya vositalarini ishlab chiqarish yoki sotish faoliyatiga to‘sqinlik qilmaydi;
- mehnat vazifalarini bajarish bilan bog‘lik holda jarohatlangan, kasb kasalliklariga chalingan yoki salomatlikning boshqa xil shikastlanishi tufayli yetkazilgan zarardan jabrlangan xodimlar protez moslamalari va reabilitatsiya vositalari bilan vaucherga muvofiq taʼminlangan hollarda, vaucher qiymatiga teng mablag‘lar javobgar bo‘lgan ish beruvchi mablag‘lari hisobidan respublika byudjetining tegishli shaxsiy g‘azna hisobvarag‘iga o‘tkaziladi. Agar moddiy javobgar bo‘lgan ish beruvchi mablag‘larni o‘z ixtiyoriga ko‘ra bir oy muddat ichida qaytarmasa, ular sud tartibida undiriladi.
Hujjat bilan quyidagilar tasdiqlandi:
- quyidagilarni nazarda tutuvchi Muhtoj shaxslarni protez-ortopediya moslamalari va reabilitatsiya qilishning texnik vositalari bilan taʼminlash tartibi to‘g‘risidagi nizom tasdiqlandi:
- protez moslamalari va reabilitatsiya vositalariga muhtojlikni belgilash va ularga bo‘lgan ehtiyojni aniqlash tartibi;
- protez moslamalari va reabilitatsiya vositalarini xarid qilish, yetkazib berish va to‘lovlarni to‘lash tartibi;
- protez moslamalari va reabilitatsiya vositalarini boshqasiga almashtirish tartibi.
Davlat tomonidan kafolatlangan tarzda taʼminlanadigan protez-ortopediya moslamalari va reabilitatsiya qilishning texnik vositalari ro‘yxati. Bunda, muhtoj shaxslarga protez moslamalari va reabilitatsiya vositalarini elektron tijorat orqali xarid qilishi uchun davlat tomonidan ro‘yxat bilan belgilangan miqdorlarda tegishli mablag‘lar qoplab beriladi.
Hujjat Qonun hujjatlari maʼlumotlari milliy bazasida eʼlon qilingan va 2024-yil 1-maydan kuchga kirdi.
Bundan oldin Mudofaa, Ichki ishlar, Favqulodda vaziyatlar vazirliklari, Milliy gvardiya, DXX, Prezident davlat xavfsizlik xizmati, Harbiy prokuratura, Bojxona qo‘mitasi va Elektron texnologiyalarni rivojlantirish markazining vatan himoyasi va el-yurt tinchligi yo‘lida yaralangani, kontuziya yoki mayib bo‘lgani oqibatida halok bo‘lgan harbiy xizmatchi va xodimlarining oila aʼzolari uchun shifokorlarning retseptlariga asosan 3 oylik ehtiyojidan kelib chiqib dori vositalarini (yiliga bir marta), tibbiy va maxsus protez ortopediya moslamalarini olib berilishi hamda jarrohlik amaliyotlarining xarajatlarini qoplanishi to‘g‘risida xabar berilgandi.
Izoh (0)