Қорақалпоғистон Республикаси, Тошкент ва Андижон вилоятларида ишга ҳамда ўқишга киритиб қўйиш билан боғлиқ фирибгарлик ҳолатлари фош этилди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Нукус туман бўлими томонидан ДХХ ва ИИВ ходимлари билан ҳамкорликда тезкор тадбир ўтказилган. Тадбирда Р.Н. исмли шахс фуқаро М.Ш.нинг ишончига кириб, уни гўёки юқори лавозимда ишловчи танишлари орқали Республика шошилинч тез тиббий ёрдам илмий маркази Қорақалпоғистон филиалига ишга киритиб қўйиши эвазига 40 миллион сўмни олган вақтида ашёвий далиллар билан ушланган.
Шу каби, департаментнинг Нукус шаҳар бўлими томонидан ДХХ ва ИИВ ходимлари билан ҳамкорликда ўтказилган тезкор тадбирда фуқаро Ж.А. фуқаро Ж.Й.ни танишлари ёрдамида 8 миллион сўм эвазига “Ўзтемирйўлйўловчи” АЖ маҳаллий йўналишларда йўловчиларга хизмат кўрсатиш филиалига ишга киритиб қўйишини айтиб, олдиндан 2,5 миллион сўмни олган вақтида ашёвий диллар билан қўлга олинган.
Департаментнинг Янгийўл туман бўлими томонидан ўтказилган тезкор тадбирда туман ободонлаштириш бошқармаси ҳайдовчиси С.С. фуқаро Д.А.нинг ишончига кириб, уни бошқарма бошлиғи Ф.А. орқали ишга киритиб қўйиши эвазига 150 долларни олган вақтида ашёвий далиллар билан ушланган.
Департаментнинг Улуғнор туман бўлими томонидан ДХХ ходимлари билан ҳамкорликда ўтказилган тезкор тадбирда Пахтаобод тумани Абу Али ибн Сино номидаги Жамоат саломатлиги техникуми хўжалик мудири А.У. фуқаро Х.А.нинг турмуш ўртоғини ушбу техникумга ўқишга киритиб қўйиши эвазига 500 долларни олган вақтида ашёвий далиллар билан ушланган.
Мазкур ҳолатлар юзасидан жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Бундан олдин Нукусда 65 минг доллар эвазига ДХХга ишга киритиб қўйишни ваъда қилган шахс ушлангани, Қашқадарёда прокуратура терговчиси 5 минг доллар пора билан қўлга тушгани тўғрисида хабар берилганди.
Изоҳ (0)