Исроил мудофаа кучлари режалаштирилган ҳарбий операцияга тайёргарлик кўриш мақсадида Рафаҳдан тинч аҳолини эвакуация қилишни бошлади. Бу ҳақда The Times of Israel хабар берди.
Ҳозирда Исроил чегараси яқинида жойлашган кварталлардан аҳоли эвакуация қилинмоқда. Исроил армияси фаластинликларни Ал-Маваси ва Хон Юнисдаги “гуманитар ҳудудлар”га кўчишга чақирмоқда. Ҳарбийлар аҳолига гуманитар зонага қандай бориш бўйича кўрсатмалар билан SMS жўнатмоқда. Эвакуация буйруғи ҳозирча фақат Рафаҳнинг баъзи шарқий ҳудудларига тегишли.
Рафаҳ Ғазо жанубида жойлашган бўлиб, фаластинликлар бошпана мақсадида шаҳарга келгани сабабли сўнгги олти ой ичида аҳолиси 1,5 миллионга кўпайди. Рафаҳ Миср билан чегарада жойлашган, БМТга кўра, у Ғазога инсонпарварлик ёрдамини киритишда муҳим ҳисобланади.
Исроил бош вазири Биньямин Нетаньяху ташқи босимга қарамай, Рафаҳга бостириб кириш режаси бекор қилинмаслигини айтганди. Ўз навбатида, Байден демократлар ва америкаликларнинг босими ортиб бормоқда. Улар Америка қуроллари ёрдамида Исроил Ғазода гуманитар қонунларни бузаётгани ва тинч аҳолини ўлдираётганини таъкидлайди.
Ўтган ой АҚШ президенти Жо Байден Нетаньяхунинг Ғазо операциясига ёндашувини хато деб атади ва сулҳ тузишга чақирди. АҚШ бу ҳафта Исроилнинг Рафаҳ шаҳрида тинч аҳолини ҳимоя қиладиган ҲАМАСга қарши режалаштирилган операция режасини кўрмаганини такрорлади ва Вашингтон бундай ҳужумни қўллаб-қувватлай олмаслигини яна бир бор таъкидлади.
Изоҳ (0)