Исроил қўшинлари Ғазо секторининг Миср билан чегарасидаги Рафаҳ шаҳрида операция ўтказади. Бу ҳақда Исроил бош вазири Биньямин Нетаньяху Фаластин анклавида гаровга олинганларнинг қариндошлари билан учрашувда маълум қилди.
“Урушни барча мақсадларга эришмагунча тўхтатмаймиз. Биз Рафаҳга кириб борамиз ва у ерда жойлашган ҲАМАС батальонларини йўқ қиламиз”, — деди Нетаньяху.
Исроил бош вазирининг таъкидлашича, бу иш “Фаластин радикаллари билан гаровга олинганларни озод қилиш бўйича келишувга эришиладими ёки йўқми, бундан қатъий назар содир бўлади”. Унинг сўзларига кўра, Рафаҳдаги операция ҲАМАС устидан “тўлиқ ғалаба қозониш” учун зарур.
Баёнотда айтилишича, гаровга олинган одамларнинг қариндошлари Исроил ҳукумати раҳбари билан суҳбатда уни “уруш мақсадларига эришишда давом этиш ва Ғазодаги вазият бўйича халқаро босимга қарши туриш”га чақирган.
Ўтган йилнинг ноябрь ойи охирида Исроил ва ҲАМАС ўртасида бир ҳафта давом этган вақтинчалик гуманитар сулҳ ўрнатилганди. 1 декабрь куни сулҳ бузилди, жанговар ҳаракатлар қайта бошланди ва ҳозиргача давом этмоқда. Исроилнинг сўнгги маълумотларига кўра, Ғазо секторида 133 нафар Исроил фуқаролари гаровда қолмоқда.
Изоҳ (0)