“Вагнер” раҳбари матбуот хизмати Евгений Пригожин билан хайрлашув “ёпиқ форматда” бўлиб ўтгани ва “хайрлашмоқчи бўлганлар “Пороховское” қабристонига ташриф буюриши мумкин лигини айтди. Бу ҳақда BBC хабар берди.
Пригожин 23 август куни Тверь вилоятидаги авиаҳалокат оқибатида ҳалок бўлди. У билан бирга бортда бўлган яна тўққиз кишининг ўлими тасдиқланди. Улар орасида “Вагнер” ўринбосари Дмитрий Уткин ҳам бор эди. Дастлаб “Вагнер” раҳбари бортдаги йўловчилар рўйхатида бўлгани айтилди, аммо Россия тергов қўмитаси унинг ўлимини 27 августда тасдиқлади.
Бунгача Россия президенти Владимир Путин, Чеченистон раҳбари Рамзан Қодиров унинг оила аъзоларига ҳамдардлик билдирди. Кремль Пригожиннинг дафн маросимида Путин қатнашмаслигини маълум қилди.
.jpg)
“Шунчаки VIP дафн маросими”
29 август кун бўйи журналистлар Санкт-Петербург атрофида дафн кортежлари ҳаракатини кузатиб борди, бироқ Пригожин қаерда ва қачон дафн этилиши ҳақида аниқ маълумот йўқ эди.
“Пороховское” қабристонида Пригожин “тахминан соат 16:00 да” дафн этилгани айтилди. Нега дафн этилган жой ҳақида аввал хабар берилмагани ҳақидаги саволга: “Қариндошлар шуни хоҳлашди”, деб жавоб берилди. “Вагнер” хусусий ҳарбий кампанияси асосчиси отасининг ёнига дафн қилинди.
Пригожинга Россия қаҳрамони сифатида берилган ҳарбий унвонлар, афтидан, дафн маросимида қайд этилмаган. Дафн маросимида 20-30 киши бўлган, ҳарбий кийимдаги одамлар кўриниш бермаган.
“20-30 киши бор эди. Фақат яқинлар ва қариндошлар, мен уларни биламан. Маросим 40 дақиқача давом этди. Ҳамма фуқаро кийимида эди, ҳарбийларни кўрмадим. Бу соҳада 30 йилдан ортиқ вақт давомида ишлайман, мен учун ҳеч қандай ғайриоддий нарса қайд этилмади, шунчаки VIP дафн маросими”, — деди қабристон ходими.
Санкт-Петербург маъмурияти сайтида айтилишича, бу шаҳардаги кам сонли “профессионал” қабристонлардан бири. У ерда ХIX асрда Охта заводида ва артиллерия полигонларида портлашларда ҳалок бўлган артиллериячилар дафн этилган.
“Қабристонда полиция йўқ”
“Вагнер” раҳбарининг яқин шерики Валерий Чекаловнинг дафн маросимида, Пригожиндан фарқли ўлароқ, журналистлар қатнашишга муваффақ бўлган. У ҳам 23 август кунги авиаҳалокатда ҳалок бўлганди.
Дафн маросимига келган эркаклардан бири, агар журналистлар “яхши маънода” суратга олмаса, бунинг оқибати ёмон бўлиши, чунки “қабристонда полиция йўқлиги”ни айтган. Чекаловнинг дафн маросими бўлиб ўтган қабристонга юзга яқин одам келган.
Пригожиннинг бизнес-жети ҳалокатга учраганида жами 10 киши ҳалок бўлган. Федерал ҳаво транспорти агентлиги хабарига кўра, Пригожин ва Чекаловдан ташқари йўловчилар рўйхатига “Вагнер” раҳбари ўринбосари Дмитрий Уткин, қўриқчилар Сергей Пропустин, Еввгений Макарян, Александр Тотмин ва Николай Матусеев, шунингдек, фуқаролик учувчилари Алексей Левшин, Рустам Каримов ва стюардесса Кристина Распопова бўлган.
Изоҳ (0)