“Асакабанк” хусусийлаштирилади

Ўзбекистоннинг йирик банкларидан бири бўлган “Асакабанк” хусусийлаштирилади.

2 май куни Тошкент халқаро инвестиция форуми доирасида Европа тикланиш ва тараққиёт банки билан “Асакабанк”ни хусусийлаштириш бўйича битим имзоланди.

Форумда нутқ сўзлаган Шавкат Мирзиёев сўнгги йилларда Ўзбекистонда кўплаб хусусий банклар очилганини, Европанинг етакчи банклари кириб келганини, қатор рақамли банклар ўз фаолиятини амалга ошираётганини қайд этди.

Таъкидланишича, молиявий ресурсларга талабни қондириш учун капитал бозорини ривожлантириш бўйича ёндашувлар қайта кўриб чиқилмоқда. Ўзбекистонда халқаро молиялаштириш инструментларини ривожлантириш устида иш олиб борилмоқда.

“Хорижий сармоялар оқими бир неча баробар ортиши, корпоратив бошқарув сифати ошиши, янги етакчи банк-молия институтлари кириб келишини кутиб қоламиз”, —  деди президент.

Эслатиб ўтамиз, Ўзбекистон банк тизимини ислоҳ қилиш стратегиясига кўра, “Ипотекабанк”, “Ўзсаноатқурилишбанк”, “Асакабанк”, “Алоқабанк”, “Қишлоққурилишбанк” ва “Tуронбанк”даги давлат улушлари босқичма-босқич хусусийлаштирилади.

Шавкат Мирзиёев 2020 йилда 6 та тижорат банки, шу жумладан, “Асакабанк”ни хусусийлаштириш масалалари бўйича халқаро молия институтлари билан ҳамкорлик бошлаганини маълум қилганди.