Россия армияси Украина армиясига қарши заҳарли модда – хлорпикриндан фойдаланиб, қуролдан фойдаланиш бўйича халқаро тақиқни бузди. Бу ҳақда Америка ташқи сиёсат департаменти хабар берди.
Шу муносабат билан АҚШнинг янги санкциялар рўйхатига Россиянинг кимёвий қурол дастурлари ва биологик қуроллари билан боғлиқ Россия Мудофаа вазирлигининг радиациявий, кимёвий ва биологик мудофаа қўшинлари, Россия амалий акустика илмий-тадқиқот институти ва Россия Мудофаа вазирлигининг 48-сонли марказий илмий-тадқиқот институти киритилган.
Бундай кимёвий моддалардан фойдаланиш биринчи ҳодиса эмас ва у Россиянинг жанг майдонида тактик ютуқларга эришиш истаги билан боғлиқ, — дейилади баёнотда.
Агентлик маълумотларига кўра, бўғувчи ва кўздан ёш оқизувчи хлорпикрин Россияда ҳам мамлакат ичидаги оммавий норозилик намойишларини бостириш доирасида ишлатилган.
Кимёвий қуролларни тақиқлаш бўйича Гаага ташкилоти томонидан тақиқланган хлорпикрин суюқлик шаклида бўлиб, у тери ва шиллиқ пардаларга таъсир қилади ҳамда юқори концентрацияларда диафрагма мушакларининг бўшашига олиб келади. У Биринчи жаҳон уруши пайтида немис қўшинлари томонидан ишлатилган.
Россия қўшинлари хлорпикриндан ташқари жанг майдонида кўздан ёш оқизувчи газли гранаталардан ҳам фойдаланмоқда, — дея хабар берди Reuters Украина ҳарбийлари баёнотига таяниб.
Кўздан ёш оқизувчи газ кўпинча полиция томонидан Европадаги намойишларда тартибсизликларга қарши қўлланилади, аммо кимёвий қуроллар бўйича конвенцияга биноан уруш пайтида уни ишлатиш тақиқланган.
Украина армияси маълумотларига кўра, камида 500 нафар украиналик аскар организмига заҳарли моддалар таъсири туфайли тиббий ёрдам кўрсатилган ва аскарлардан бири кўздан ёш оқизувчи газдан ҳалок бўлган.
Изоҳ (0)