Украинадаги Россия махсус кучлари 10 километрдан ортиқ радиусдаги барча электрон қурилмаларни ўчириб қўядиган қуроллар билан жиҳозланган. Бу ҳақда The Times хабар берди.
Маълум қилинишича, электромагнит импулси билан зарба бериш Украинанинг фуқаролик инфратузилмасини ишдан чиқариши мумкин. Бу эса мамлакатнинг ўзини ҳимоя қилиш қобилиятига жиддий зарба беради. Россия бунга эришиш учун Ердан учириладиган ва ядровий бўлмаган электромагнит қуроллардан фойдаланиши мумкин, дейилади хабарда.
«Бундай қуроллардан берилган зарбалар ўзидан деярли из қолдирмайди. Шу учун Россия ундан фойдаланган бўлиши мумкинлигини текшириш жуда қийин», — деди Қироллик бирлашган қуролланиш институтининг катта илмий ходими Жастин Брок.
The Times’га кўра, Россия Украинада электр ва сув таъминотини ўчиришга ҳаракат қилмоқда. Россиянинг электромагнит қуролларидан фойдаланиши, эҳтимол НАТОнинг кескин жавобини келтириб чиқаради.
Электрон урушлар бўйича эксперт Томас Утингтоннинг айтишича, Ғарб узоқ вақтдан бери электромагнит зарбасини ядровий урушнинг дебочаси сифатида кўриб келган ва ундан Украинада фойдаланиш НАТО томонидан хавфли ядровий ҳужумлар сари қадам сифатида талқин қилиниши мумкин. Бироқ, бунинг эҳтимоли унчалик юқори эмас. Геосиёсат бўйича тадқиқотчи директор Жеймс Рожерс фикрича, Путин танаффусни хоҳламоқда, электромагнит ҳужум эса вазиятни ўзгартириши мумкин.
Эслатиб ўтамиз, АҚШ президенти Жо Байден Россия раҳбари Владимир Путин тактик ядро қуроллари, биологик ёки кимёвий қуроллардан фойдаланиш эҳтимоли ҳақида гапирганда ҳазиллашмаслигини маълум қилганди. У бу гапини Путинни яхши билиши билан изоҳлаб кетганди.
Изоҳ (0)