Бугун, 27 апрель куни тунда Қозоғистоннинг марказий қисмларида ва Қамчиқ довонида қор ёғмоқда. Бундай ҳаво ҳарорати Ўзбекистонга қай даражада таъсир қилиши юзасидан иқлимшунос олим Эркин Абдулаҳатов “Дарё” нашрига маълумот берди.
Олимнинг айтишича, совуқ антициклон Қозоғистоннинг Қарағанда шаҳри устидан ўтмоқда ва бу аввалроқ прогноз қилинган.
“Казгидромет” прогнозларида мамлакатнинг шимолий ҳудудлари -10 даражагача совиб кетиши айтилган эди.
Ўзбекистоннинг тоғли ҳудудларида — денгиз сатҳидан 2 километр юқорида 0 даражага яқин ҳарорат кузатилмоқда. Қозоғистоннинг марказий ҳудудларида эса ҳарорат 0 даражадан паст ва қор бор”, — деди Эркин Абдулаҳатов.
Унинг таъкидлашича, бундай ҳаво ҳароратини инсон танаси, физиологияси реал қийматдан пастроқ қийматларда “ҳис қилишига” олиб келади.
“Жорий антитциклоннинг кириб келиши тоғларда ҳавонинг тўйинишини ва ёғаётган ёғингарчиликни кристалл кўринишга олиб келади, бу қор дегани. Жойларда антитциклон кириб келишида шамоллар кузатилиб, ҳаво ҳарорати тез пасаймоқда. Бу ҳароратни ҳис қилиш ҳам шамол ҳисобига сезиларли паст. Масалан, ҳаво ҳарорат +20 даража бўлганда 5-6 метр/секунд тезликда шамол эсаётган бўлса, инсон танаси ҳавони 7-8 даража илиқ ҳис қилишига олиб келади. Бу ҳис қилиш жараёни дейилади. Бундай ҳаво ҳарорати республиканинг катта ҳудудида, жумладан, Тошкентда ҳам кузатилмоқда”, — дейди иқлимшунос олим.
“Ўзгидромет” бундай ҳаво Ўзбекистон ҳудудига қандай таъсир қилиши, совуқ уриш прогнозлари ҳақида маълумот бергани йўқ. Экин ва ҳосилларга хавф борми, агар бўлса улар буни камайтириш билан боғлиқ ҳимоя чораларини кўриши ҳақида кўрсатма мавжуд эмас.
Изоҳ (0)