Ғарбий Австралияда қирғоққа чиқиб қолган 100 дан ортиқ кит қутқариб қолинди

Австралиянинг ғарбий қисмида қирғоққа чиқиб қолган 100 дан ортиқ китлар ўлимдан қутқариб қолинди. Бу ҳақда CNN нашри хабар берди.

Денгиз жониворларини қутқариш бўйича операция 25 апрель куни туш пайтида бошланган. Ёввойи табиатни муҳофаза қилиш бўйича ташкилотлар ходимлари китларни денгизга қайтаришга эришган.

Қутқарув гуруҳлари китларга ёрдам бериш учун Перт шаҳри жанубидаги Дансборо соҳилида тўпланишган. Қутқарув операциясида иштирок этган Geographe Marine Research гуруҳи раҳбари Ян Визнинг айтишича, соҳилда “ғаройиб манзара” юзага келган. Соҳилдаги жониворларни кўриш учун юзлаб кузатувчилар келган.

Ғарбий Австралиянинг миллий қўриқхоналар ва ёввойи табиат хизмати департаменти маълумотларига кўра, жами 160 та кит қирғоққа чиқиб қолган. Улардан жами 130 таси денгизга қайтарилган. Камида 28 та кит ҳалок бўлган.

“Соҳилда юзлаб китларнинг тўпланганини кўрганимда менинг дастлабки муносабатим жуда ҳайратланарли бўлди. Бу ҳақиқатан ҳам хаотик ҳодиса”, — деган қутқарув операцияси қатнашчиларидан бири.

Мутахассислар китларнинг соҳилга чиқиб қолиши билан боғлиқ ҳолатни океан суви ҳарорати ўзгариши омили билан боғлаган.