Пул ювишга қарши кураш чора-тадбирлари доирасида Европа парламенти 10 минг евродан ортиқ нақд пул тўловларини тақиқлаш учун овоз берди, дея Deutsche Welle хабар берди.
Хабарга кўра, 24 апрель куни Европарламент депутатлари миллий қонунчиликдаги бўшлиқларни ёпиш учун мўлжалланган пул ювишга қарши умумевропа қоидаларини жорий этишни қўллаб-қувватладилар.
Йирик нақд пул операцияларини тақиқлашдан ташқари, янги қоидалар ҳашаматли товарлар сотувчилардан ўз мижозларининг шахсини текширишни ва шубҳали операциялар ҳақида ҳокимиятга хабар беришни талаб қилади. Қоидаларнинг қатъийлаштирилиши, жумладан, заргарлик буюмлари, ҳашаматли автомобиллар, шахсий самолётлар ва яхталар савдосига таъсир қилади.
Бундан ташқари, расмийлар криптовалюталар билан операцияларни ва 50 миллион евродан ортиқ активлари бўлган ўта бой одамларнинг банк операцияларини синчковлик билан кузатишни талаб қилган. Акцияларнинг камида тўртдан бирига эга бўлган компания эгалари бутун Европа Иттифоқида рўйхатдан ўтишлари керак. Бу чоралар, хусусан, россиялик олигархларни Европа Иттифоқи санкцияларини четлаб ўтиш имкониятидан маҳрум этишга қаратилган.
Янги қоида 2029 йилда кучга кириши керак. Мувофиқлик учун жавобгарлик штаб-квартираси Франкфурт Майнда жойлашган янги Европа Пул ювишга қарши кураш бошқармаси (AMLА) билан келишилган ҳолда миллий ҳокимият органларига юкланади.
Изоҳ (0)