Шимолий Корея тарихда илк бор шартли ядровий қарши зарба бўйича тактик машғулотлар ўтказди. Бу ҳақда Корея марказий ахборот агентлиги (KCNA) хабар берди.
Машғулотлар давомида ядро каллагига тақлид қилинган кучли ракета снарядлари отилган, улар 352 километр масофадаги нишонга муваффақиятли етиб борган.
“Машғулотнинг асосий мақсади Шимолий Корея ядровий кучларининг ишончлилиги, мураккаблиги ва қудратини намойиш этиш бўлди. Бу душманларнинг провокацион ҳаракатлари фонида уларга огоҳлантириш сигналига айланди”, — дейилади хабарда.
Тадбирда иштирок этган Шимолий Корея етакчиси Ким Чен Инга кўра, машғулотларни “ҳар қандай вақтда, ҳар қандай вазиятда урушни тўхтатиш ва ташаббусни қўлга киритишдек муҳим миссияни зудлик билан ва аниқ бажаришга” қодир ядровий қуролли кучлар тайёрлаган.
2023 йил охирида Ким Чен Ин Шимолий Корея АҚШнинг “мисли кўрилмаган” қарама-қарши ҳаракатларига қарши туриш учун 2024 йилда урушга тайёргарликни тезлаштириши кераклигини айтганди. У Жанубий Кореяни “душман давлат” деб атаган ва бу таърифни КХДР конституциясида мустаҳкамлаб қўйишга чақирган.
Изоҳ (0)