HeadHunter иш қидиришга ихтисослашган онлайн-платформаси иш берувчилар вакансияси таҳлилидан келиб чиқиб Ўзбекистонда ҳайдовчиларга бўлган талаб ортганини маълум қилди.
Қайд этилишича, Ўзбекистондаги ҳайдовчилар бозори таклиф этилаётган иш ҳақи ва касбга бўлган талаб даражасида ҳайратланарли даражада ўсишда давом этмоқда. Сўнгги маълумотларга кўра, мамлакатда 2023 йилда ҳайдовчиларнинг иш ҳақи ундан олдинги йилга нисбатан 35 фоизга ўсган ва 5,5 миллион сўмдан ортиқни ташкил этган. Ушбу ўсиш ҳайдовчиларнинг Ўзбекистон иқтисодиётидаги роли сезиларли даражада ортиб бораётганидан далолат беради.
Айниқса, Тошкент, Самарқанд, Бухоро ва Наманган каби йирик шаҳарларда ҳайдовчиларга талаб юқори. Такси ҳайдовчилар, шунингдек, юк машина ва экспедитор ҳайдовчилар вакансияси маоши 12 миллион сўмдан 24 миллион сўмгача бўлган “қиммат” таклифлар орасида етакчи позицияни эгалламоқда.
2024 йил апрель ҳолатига кўра, мамлакатда ҳайдовчиларга бўлган талаб ўтган йилга нисбатан 43 фоизга ошган, 2023 йилда умумий вакинсиялар сони қарийб 4 мингни ташкил этган.
“Таъкидлаш керакки, ҳар учинчи бўш иш ўринларида меҳнат шартномасини тузиш имконияти кўрсатилмоқда”, — дейилади хабарда.
Ўзбекистонда 2024 йил 1 март ҳолатига кўра, ўзини ўзи банд қилган ҳайдовчилар томонидан жами кўрсатилган хизматлар сони 18,3 миллиондан ошгани тўғрисида хабар берилганди.
Изоҳ (0)