Ўзбекистонда ўтган ҳафта пиёзнинг улгуржи нархи 1500 сўмгача тушиб кетгани тўғрисида хабар берилганди. Қишлоқ хўжалиги вазирлиги мазкур ҳолатга муносабат билдириб, ушбу маълумотлар бир ёқлама ёндашув асосида кенг оммага тақдим этилаётганини маълум қилди.
Ўрганишлар натижасига кўра, бозорларда анчадан буён 1 килограмм пиёз (ҳудудлардан келиб чиққан ҳолда) 2500 сўмдан – 3500 сўмгача бўлган турғун нархларда сотилаётгани, деҳқон ва фермерлар томонидан сотувчиларга (улгуржи савдо) етказиб берилаётган пиёзнинг ўртача нархи 1500-2000 сўмни ташкил этиши маълум бўлган.
Таъкидланишича, кузда йиғиб олинадиган пиёз ҳосилдорлиги 1 гектардан ўртача 80 тоннани (Оҳангарон, Зомин, Зарбдор, Ховос каби пиёз етиштиришга ихтисослашган туманларда 100 тонна) ташкил этади. Ҳар килограмм пиёз етиштириш харажати ўртача 800-1000 сўмни ташкил этади.
Бугунги кунгача сақлаш ва табиий йўқотиш (қуриш)ни ҳисобга олганда 1 килограмм учун 1200-1300 сўмга айланади. Шунга асосланиб, ишлаб чиқарувчи фермер сотувчиларга етказиб бериш харажатини инобатга олган ҳолда 1500-2000 сўм атрофида сотмоқда.
Ижтимоий тармоқ фаоллари айнан ушбу хабарни чиқаришда фермерлар томонидан ишлаб чиқарувчиларнинг сақлаш омборларидан савдога чиқарилаётган пиёзнинг (ўтган йилги ҳосил) нархини асос қилиб кўрсатмоқда, — дейилади хабарда.
Эслатиб ўтамиз, 2023 йилда Ўзбекистондан пиёз экспорти рекорд ўрнатганди. Ўзбекистон пиёз экспортининг 95 фоизи Евросиё иқтисодий иттифоқи мамлакатлари бозорларига етказиб берилган. Март ойи ўрталаридан июнь охиригача хорижга 222,8 минг тонна пиёз жўнатилган эди. 2022 йилнинг шу даврига нисбатан бу кўрсаткич 53 фоизга ошганди.
Қишлоқ хўжалиги вазирлиги яна бир бор оммавий ахборот воситалари вакиллари ҳамда блогерларни тарқатилаётган ахборотнинг ишончлилигини текшириш ва холис ахборот тақдим этишга чақирди.
Изоҳ (0)