Yevrokomissiya rahbari: “2022-yildan beri Yevropa Ittifoqi davlatlarining harbiy byudjetlari 20 foizga oshdi”

2022-yilda Rossiyaning Ukrainadagi harbiy amaliyotlari boshlanganidan keyin Yevropa Ittifoqi davlatlarining mudofaa byudjeti 20 foizga oshdi.

Bu haqda Yevropa komissiyasi rahbari Ursula fon der Lyayen Bryusselda bo‘lib o‘tgan Yevropa mudofaa sanoati konferensiyasida ma’lum qildi. Uning so‘zlariga ko‘ra, bu o‘sish so‘nggi yillarda ushbu sohaning yetarli darajada moliyalashtirilmagani bilan bog‘liq.

“Bizning milliy harbiy byudjetlarimiz 2022-yilga nisbatan 20 foizga oshdi va bu mablag‘lar so‘nggi yillarda harbiy sohaning yetarlicha moliyalashtirilmaganini qoplashni boshladi”, — dedi u.

Yevrokomissiya rahbari, shuningdek, samaradorlikni oshirish uchun Yevropa mudofaa sanoatini rahbarlik ostida birlashtirishga chaqirdi.

2023-yilda Yevropa Ittifoqi mamlakatlari mudofaaga yalpi ichki mahsulotning o‘rtacha 1,7 foizini sarfladi. Bundan tashqari, Ukrainada jangovar harakatlar boshlanganidan beri Yevropa armiyalari yangi texnikaning 78 foizini Yevropa Ittifoqiga a’zo bo‘lmagan mamlakatlardan sotib oldi.

2024-yilda Germaniya NATOning mudofaa xarajatlari yalpi ichki mahsulotining 2 foizini tashkil etish maqsadiga birinchi marta erishadi. Yaqinda Yevropa Ittifoqining diplomatiyasi rahbari Jozep Borrel harbiy xarajatlarni yalpi ichki mahsulotning 2 foizidan ko‘prog‘iga oshirish zarurligini e’lon qilgandi.

Shu bilan birga, Germaniya Iqtisodiy tadqiqotlar institutining (IFO) hisob-kitoblariga ko‘ra, ba’zi Yevropa Ittifoqi mamlakatlari yaqin kelajakda mudofaa xarajatlari bo‘yicha yalpi ichki mahsulotning 2 foizini tashkil etadigan NATO maqsadiga erisha olmaydi. Buning asosiy sababi sifatida iqtisodiyotning past o‘sish sur’atlari keltirilgan.