Россия тинчликпарвар кучлари 17 апрель куни Озарбайжон таркибидаги Тоғли Қорабоғ ҳудудини тарк этишни бошлади. Бу ҳақда Кремль тарқатган хабарларга таяниб, The Moscow Times нашри хабар берди.
Манбада айтилишича, Москва кўрсатмаси билан Тоғли Қорабоғдан рус ҳарбий қисмларини босқичма-босқич олиб чиқиш бошланган. Кремль расмийлари ҳам қўшинлари олиб чиқилишини тасдиқлаган.
Воқеа ҳақида дастлаб халқаро нашрлардан Озарбайжоннинг Musavat ахборот нашри маълум қилган. Сўнгра кўплаб халқаро нашрлар рус ҳукумати билан боғланиб, вазиятга аниқлик киритган.
Озарбайжон медиа сегментида тарқатилган тасдиқланмаган кадрларда Шимолий Кавказ ҳудудидан Россия байроғи остидаги ҳарбий машиналар карвони ҳаракатланаётгани кўрсатилган. Нашрлар қўшинлар кўчирилишини уларга зарурат қолмаганлиги билан изоҳлаган.
Россия тинчликпарвар кучлари Қорабоғ ҳудудига 2020 йил ноябрь ойида Арманистон ва Озарбайжон ўртасида юзага келган кескинликдан сўнг жойлаштирилган эди. Ўша пайтда рус контингенти ҳажми 2000 нафарга яқин ҳарбий хизматчи ва 90 та зирҳли транспорт воситасидан иборат бўлгани маълум қилинган.
2023 йил сентябрида Озарбайжон Тоғли Қорабоғни тўла эгаллаш учун махсус операция ўтказди. Оқибатда пойтахти Степанакерт бўлган тан олинмаган республика Боку қўлига ўтди. Унда яшаётган 100 мингга яқин этник арманлар Арманистонга кўчиб ўтди.
Қарийб 30 йил давомида Ереванга бўйсунган ҳудудлар Озарбайжонга ўтиш ва Россия бунга таъсир эта олмаслиги минтақадаги рус тинчликпарвар кучлари мавқейига путур етказган эди.
Изоҳ (0)